بٷگٸن استانادا قر ەنەرگەتيكا مينيسترٸ قانات بوزىمباەۆ شىمكەنت, پاۆلودار جەنە اتىراۋ قالالارىنداعى مۇناي زاۋىتتارىنىڭ باسشىلارىمەن كەزدەسٸپ, زاۋىتتارداعى جاڭعىرتۋ جۇمىسىمەن تانىستى, دەپ حابارلايدى قازاقپارات تٸلشٸسٸ.
ەنەرگەتيكا مينيسترٸمەن كەزدەسۋدە پاۆلودار مۇناي-حيمييا زاۋىتىنىڭ باس ديرەكتورى دانباي شۋحرات ەرتەڭگٸ كٷنٸ-اق زاۋىتتىڭ رەاكتورىنا شيكٸزات قابىلداۋعا بولاتىنىن اتاپ ٶتتٸ. ونىڭ ايتۋىنشا, زاۋىتتاعى جاڭعىرتۋ جوباسى 100 پايىزعا اياقتالعان. قوسىمشا سۇراقتار ٷشٸن دە ۋاقىت كەرەك. مۇناي زاۋىتىنىڭ باسشىسىنىڭ سٶزٸنە سەنسەك, قازٸرگٸ تاڭدا زاۋىت تەۋلٸگٸنە 2500 توننا بەنزين ٶندٸرٸپ جاتىر. كاتاليكالىق كرەكينگ ٸسكە قوسىلعاننان كەيٸن تەۋلٸگٸنە 4 مىڭ توننا بەنزين ٶندٸرٸلەتٸن بولادى.
دەسە دە, دانباي شۋحرات مۇناي زاۋىتىندا سۋتەگٸ قۇرىلعىسىنداعى تەحنيكالىق اقاۋلىققا بايلانىستى جۇمىستىڭ بٸر بٶلٸگٸ اقساپ تۇرعانىن ايتتى.
«بٸز بۇل ۋچاسكٸنٸ ٶز كٷشٸمٸزبەن جٶندەۋگە قاتىستى قاتەلٸگٸمٸزدٸ مويىندايمىز. سۋتەگٸ قۇرىلعىسىنسىز جۇمىس ٸستەۋ مٷمكٸن ەمەس. مۇناي زاۋىتىنىڭ باسشىلىعى شەتەلدەن سۋتەگٸ قۇرىلعىسىنا تاپسىرىس بەرگەن. جەتكٸزۋشٸ 9-10 جەلتوقسانعا دەيٸن اتالعان قۇرىلعىنى جەتكٸزۋگە ۋەدە بەرٸپ وتىر», - دەيدٸ ول.
ەنەرگەتيكا مينيسترٸ كەسٸپورىن باسشىلىعى زاۋىتتى جاڭعىرتۋعا بايلانىستى تيٸستٸ جۇمىستار اتقارماعانىن مەلٸم ەتتٸ.
«مەن سٸزگە 1 قاراشا كٷنٸ تاپسىرما بەردٸم, سٸز 8 قاراشادا زاۋىتتىڭ بٸرقاتار قۇرىلعىسى ٸسكە قوسىلاتىنىن ايتتىڭىز. بٷگٸن 7 قاراشا. بٷگٸن قۇرىلعىنىڭ 10 قاراشا ورناتىلاتىنىن ايتىپ وتىرسىز. بۇل دەگەنٸڭٸز نارىققا جولداعالى وتىرعان بەنزيننٸڭ مٶلشەرٸ ازايادى دەگەن سٶز. ول ارزان باعامەن رەسەيلٸك بەنزيندٸ نارىقتان ىسىراتىن قازاقستاندىق بەنزين بولۋى كەرەك ەدٸ. سٸز بۇل مەسەلەنٸ سوزعان سايىن ەل ٷشٸن قيىنعا تٷسە بەرەدٸ. مەنٸڭشە, مەسەلەنٸ شەشپەسەڭٸز, بۇل تۇرعىدا سٸزبەن ەڭگٸمەنٸ جالعاستىرۋدىڭ دا مەنٸ قالمايدى. ەكٸنشٸ سۇراق: جٶندەۋ جۇمىستارىن ساپاسىز جٷرگٸزگەندٸكتەن, سٸزدٸڭ زاۋىتىڭىزدا ايىنا 150 مىڭ توننا ەمەس, 25 مىڭ توننا ديزەلدٸك وتىن ٶندٸرٸلەتٸن بولادى. دەمەك, سٸز بۇل ديزەلدٸ وتىندى يمپورتتاۋعا تۋرا كەلەدٸ. وسى سەبەپتٸ, مەنٸڭشە, بۇل جۇمىستى تىعىرىققا تٸرەدٸڭٸز دەپ ەسەپتەيمٸن. ايىپتى تەحنيكادان كٶرۋ ەلبەتتە تٷسٸنٸكتٸ. بٸزدە بەنزين مەسەلەسٸ بار ەدٸ, بۇدان بىلاي بٸزدە ديزەلدٸك وتىنعا قاتىستى مەسەلە تۋىنداۋى ىقتيمال. سوندىقتان, سٸزدٸڭ تاراپىڭىزدان اتقارىلعان جۇمىسقا قاناعاتتاناتىنداي دەرەجەدە ەمەس دەپ باعا بەرەمٸن», - دەدٸ قانات بوزىمباەۆ.
