Búgin Astanada QR Energetika ministri Qanat Bozymbaev Shymkent, Pavlodar jáne Atyraý qalalaryndaǵy munai zaýyttarynyń basshylarymen kezdesip, zaýyttardaǵy jańǵyrtý jumysymen tanysty, dep habarlaidy QazAqparat tilshisi.
Energetika ministrimen kezdesýde Pavlodar munai-himiia zaýytynyń bas direktory Danbai Shýhrat erteńgi kúni-aq zaýyttyń reaktoryna shikizat qabyldaýǵa bolatynyn atap ótti. Onyń aitýynsha, zaýyttaǵy jańǵyrtý jobasy 100 paiyzǵa aiaqtalǵan. Qosymsha suraqtar úshin de ýaqyt kerek. Munai zaýytynyń basshysynyń sózine sensek, qazirgi tańda zaýyt táýligine 2500 tonna benzin óndirip jatyr. Katalikalyq kreking iske qosylǵannan keiin táýligine 4 myń tonna benzin óndiriletin bolady.
Dese de, Danbai Shýhrat munai zaýytynda sýtegi qurylǵysyndaǵy tehnikalyq aqaýlyqqa bailanysty jumystyń bir bóligi aqsap turǵanyn aitty.
«Biz bul ýchaskini óz kúshimizben jóndeýge qatysty qateligimizdi moiyndaimyz. Sýtegi qurylǵysynsyz jumys isteý múmkin emes. Munai zaýytynyń basshylyǵy shetelden sýtegi qurylǵysyna tapsyrys bergen. Jetkizýshi 9-10 jeltoqsanǵa deiin atalǵan qurylǵyny jetkizýge ýáde berip otyr», - deidi ol.
Energetika ministri kásiporyn basshylyǵy zaýytty jańǵyrtýǵa bailanysty tiisti jumystar atqarmaǵanyn málim etti.
«Men sizge 1 qarasha kúni tapsyrma berdim, siz 8 qarashada zaýyttyń birqatar qurylǵysy iske qosylatynyn aittyńyz. Búgin 7 qarasha. Búgin qurylǵynyń 10 qarasha ornatylatynyn aityp otyrsyz. Bul degenińiz naryqqa joldaǵaly otyrǵan benzinniń mólsheri azaiady degen sóz. Ol arzan baǵamen reseilik benzindi naryqtan ysyratyn qazaqstandyq benzin bolýy kerek edi. Siz bul máseleni sozǵan saiyn el úshin qiynǵa túse beredi. Menińshe, máseleni sheshpeseńiz, bul turǵyda sizben áńgimeni jalǵastyrýdyń da máni qalmaidy. Ekinshi suraq: jóndeý jumystaryn sapasyz júrgizgendikten, sizdiń zaýytyńyzda aiyna 150 myń tonna emes, 25 myń tonna dizeldik otyn óndiriletin bolady. Demek, siz bul dizeldi otyndy importtaýǵa týra keledi. Osy sebepti, menińshe, bul jumysty tyǵyryqqa tiredińiz dep esepteimin. Aiypty tehnikadan kórý álbette túsinikti. Bizde benzin máselesi bar edi, budan bylai bizde dizeldik otynǵa qatysty másele týyndaýy yqtimal. Sondyqtan, sizdiń tarapyńyzdan atqarylǵan jumysqa qanaǵattanatyndai dárejede emes dep baǵa beremin», - dedi Qanat Bozymbaev.
