باتىس قازاقستان وبلىسىندا توك سوعىپ, ەكٸ قولىنان ايرىلعان بالاعا قاتىستى تەرگەۋ جٷرٸپ جاتىر. بۇل تۋرالى ٶڭٸر ەكٸمٸ عالي ەسقاليەۆ مەلٸم ەتتٸ, دەپ حابارلايدى قازاقپارات.
بٷگٸن ورتالىق كوممۋنيكاتسييالار قىزمەتٸ الاڭىندا ٶتكەن باسپاسٶز مەسليحاتىندا تٸلشٸ عالي ەسقاليەۆكە مىناداي ساۋال قويدى: «ٶتكەندە بقو-دا 5 جاسار بالانى توك ۇرىپ, ول 2 قولىنان ايىرىلدى. وسىعان ٶزٸڭٸزدٸ كٸنەلٸ سانامايسىز با? سەبەبٸ بۇعان دەيٸن سول اشىق جاتقان ترانسفورماتورعا 5 سيىر توكقا تٷسٸپ, ارام ٶلٸپتٸ. مەسەلەنٸ قوعام بەلسەندٸلەرٸ دە ۋاقىتىلى كٶتەرگەن. وسى مەسەلەنٸ وبلىس ەكٸمٸ رەتٸندە نەگە قاداعالامادىڭىز?»
ٶز كەزەگٸندە وبلىس باسشىسى بالانىڭ جاعدايىمەن جەكە بارىپ تانىسپاعانىن, بٸراق حاباردار ەكەنٸن ايتتى.
«ەرينە, ەكٸم رەتٸندە مەن بارلىق وسىنداي قايعىلى وقيعالارعا جاۋاپتىمىن. قازٸر بولعان جايتقا قاتىستى تەرگەۋ-تەكسەرۋ امالدارى جٷرٸپ جاتىر. ەگەر ەكٸمدٸككە قاراستى كومپانييانىڭ كٸنەسٸ دەلەلدەنسە, ەرينە تيٸستٸ شارانى قولدانامىز. ٶتە ٶكٸنٸشتٸ, قايعىلى جاعداي. قىلمىستىق ٸس سوتقا جەتكەننەن كەيٸن جاعدايدى باقىلاپ, زاڭ اياسىندا شارا قابىلداناتىن بولادى. بالاعا تيٸستٸ كٶمەك كٶرسەتەمٸز. ەرينە مۇنداي جاعداي بولماۋى تيٸس», - دەپ جاۋاپ بەردٸ عالي ەسقاليەۆ.
ەسكە سالساق, بيىل 25 مامىردا باتىس قازاقستان وبلىسىندا توك سوققان ەكٸ بالانىڭ اۋرۋحاناعا تٷسكەنٸ تۋرالى حابارلاعان ەدٸك.
ٶڭٸرلٸك تٶتەنشە جاعداي دەپارتامەنتٸ تاراتقان اقپاراتقا سەيكەس 4 بالا ويناپ جٷرٸپ, كٸشٸ ستانتسييانىڭ قورشالعان جابىق اۋماعىنا كٸرگەن. سول كەزدە 5 جاسار ۇل بالانى توك سوققان. ونىڭ جاعدايى اۋىر.
