Batys Qazaqstan oblysynda tok soǵyp, eki qolynan airylǵan balaǵa qatysty tergeý júrip jatyr. Bul týraly óńir ákimi Ǵali Esqaliev málim etti, dep habarlaidy QazAqparat.
Búgin Ortalyq kommýnikatsiialar qyzmeti alańynda ótken baspasóz máslihatynda tilshi Ǵali Esqalievke mynadai saýal qoidy: «Ótkende BQO-da 5 jasar balany tok uryp, ol 2 qolynan aiyryldy. Osyǵan ózińizdi kináli sanamaisyz ba? Sebebi buǵan deiin sol ashyq jatqan transformatorǵa 5 siyr tokqa túsip, aram ólipti. Máseleni qoǵam belsendileri de ýaqytyly kótergen. Osy máseleni oblys ákimi retinde nege qadaǵalamadyńyz?»
Óz kezeginde oblys basshysy balanyń jaǵdaiymen jeke baryp tanyspaǵanyn, biraq habardar ekenin aitty.
«Árine, ákim retinde men barlyq osyndai qaiǵyly oqiǵalarǵa jaýaptymyn. Qazir bolǵan jaitqa qatysty tergeý-tekserý amaldary júrip jatyr. Eger ákimdikke qarasty kompaniianyń kinási dáleldense, árine tiisti sharany qoldanamyz. Óte ókinishti, qaiǵyly jaǵdai. Qylmystyq is sotqa jetkennen keiin jaǵdaidy baqylap, zań aiasynda shara qabyldanatyn bolady. Balaǵa tiisti kómek kórsetemiz. Árine mundai jaǵdai bolmaýy tiis», - dep jaýap berdi Ǵali Esqaliev.
Eske salsaq, biyl 25 mamyrda Batys Qazaqstan oblysynda tok soqqan eki balanyń aýrýhanaǵa túskeni týraly habarlaǵan edik.
Óńirlik tótenshe jaǵdai departamenti taratqan aqparatqa sáikes 4 bala oinap júrip, kishi stantsiianyń qorshalǵan jabyq aýmaǵyna kirgen. Sol kezde 5 jasar ul balany tok soqqan. Onyń jaǵdaiy aýyr.
