فوتو: inbusiness.kz
قازاقستاندىقتار 1-سىنىپقا قابىلداۋعا 270 مىڭنان استام ٶتٸنٸم بەردٸ, دەپ حابارلايدى «ۇلت اقپارات» inbusiness.kz-كە سٸلتەمە جاساپ.
1-سىنىپقا ٶتٸنٸمدەر قابىلداۋ 2024 جىلعى 31 تامىزعا دەيٸن جالعاسادى.
بٷگٸنگە دەيٸن 275177 ٶتٸنٸم كەلٸپ تٷستٸ. بٸرٸنشٸ سىنىپقا وقۋشىلاردى قابىلداۋ بويىنشا اقمولا, الماتى, جەتٸسۋ, پاۆلودار وبلىستارى 100 پايىز كٶرسەتكٸشكە قول جەتكٸزگەن. الدىن الا بولجام بويىنشا, 2024 جىلدىڭ 31-جەلتوقسانىنا دەيٸن 6 جاسقا تولاتىن بالالار سانى 370 مىڭنان اسادى, وسىلايشا ولاردىڭ بٸرٸنشٸ سىنىپقا بارۋعا تولىق مٷمكٸندٸگٸ بار.
ازاماتتارعا قولايلى بولۋ ٷشٸن قىزمەت كٶرسەتۋ تولىعىمەن اۆتوماتتاندىرىلدى. اتا-انالار مەن بالالاردىڭ زاڭدى ٶكٸلدەرٸ ٶز ٶتٸنٸمدەرٸن ەgov.kz ەلەكتروندى پورتالىندا, سونداي-اق جەرگٸلٸكتٸ اتقارۋشى ورگانداردىڭ اقپاراتتىق جٷيەلەرٸ ارقىلى تاپسىرا الادى. بٸرٸنشٸ سىنىپقا بالالار 6 جاستان باستاپ اتا-اناسىنىڭ نەمەسە بالانىڭ زاڭدى ٶكٸلٸنٸڭ ٶتٸنٸشٸ نەگٸزٸندە قابىلدانادى. ٶتٸنٸمدەر دەمالىس پەن مەرەكە كٷندەرٸنەن باسقا, دٷيسەنبٸدەن جۇماعا دەيٸن قابىلدانادى.
