الماتىدا ٶتكەن تٷندە ەكٸ جەڭٸل اۆتو مەن جەدەل جەردەم كٶلٸگٸن ۇرلاعان ەر ادام ۇستالدى, دەپ حابارلايدى Sputnik قازاقستان.
الماتى پوليتسييا دەپارتامەنتٸنٸڭ حابارلاۋىنشا, قۇلجا تراكتٸسٸندەگٸ تۇرعىن ٷي كەشەنٸنٸڭ اۋماعىنان BMW ماركالى اۆتوكٶلٸكتٸ ايداپ ەكەتۋ تۋرالى العاشقى حابارلاما پوليتسيياعا 21.45-تە تٷسكەن. اۋلادان شىققان ۇرى Audi-مەن سوقتىعىسىپ, وقيعا ورنىنان قاشىپ كەتكەن.
نازار اۋدارىڭىز! ۆيدەودا بالاعات سٶزدەر ايتىلعان.
ول ۇرلانعان كٶلٸكپەن الماتى وبلىسى ەڭبەكشٸقازاق اۋدانىنىڭ ەسٸك قالاسىنا جەتٸپ, قارسى باعىتقا شىعىپ, Toyota اۆتوكٶلٸگٸمەن سوقتىعىسقان. الايدا ۇرى وقيعا ورنىنان جاياۋ ٸزٸن سۋىتقان. سودان كەيٸن ول 28 جاستاعى قىزدان Nissan كٶلٸگٸن كٷشپەن تارتىپ الىپ, تاسجولدا اۋدارىلعان. كۋەگەرلەر جەدەل جەردەم شاقىرعان كەزدە ەر ادام جەدەل جەردەم كٶلٸگٸن دە ايداپ كەتكەن.
"كۋەگەرلەر جەدەل جەردەم شاقىردى. ال ۇرى مەديتسينالىق بريگادا كٶلٸگٸن دە ايداپ كەتتٸ. ول وبلىستىق جەدەل جەردەم ستانتسيياسىنا تيەسٸلٸ Jac Sunray-مەن قالاعا كٸرگەندە بٸردەن پاترۋلدٸك پوليتسييا ەكيپاجى ۇستادى", - دەپ ناقتىلادى الماتى پوليتسيياسى.
مەديتسينالىق كۋەلاندىرۋ 1994 جىلى تۋعان كٷدٸكتٸ ەسٸرتكٸ قابىلداعانىن كٶرسەتتٸ. قازٸر ول قاماۋدا وتىر. پوليتسييا ۇرلىق فاكتٸسٸ بويىنشا بٸردەن ٷش قىلمىستىق ٸس قوزعادى.
