نۇر-سۇلتان ەكٸمٸ التاي كٶلگٸنوۆ قۇرىلىس ماگناتى, BI Group باسشىسى ايدىن راحىمباەۆ جۇمىستىڭ قۇنىن بٸلگەن سوڭ LRT باعاندارىن ٶز قارجىسى ەسەبٸنەن بۇزۋدان باس تارتقانىن مەلٸمدەدٸ, دەپ حابارلايدى Sputnik قازاقستان اگەنتتٸگٸ.
ونىڭ ايتۋىنشا, نۇر-سۇلتاننىڭ سول جاعالاۋىندا ورناتىلعان باعاندار بەرٸك ەرٸ ساپالى بەتوننان جاسالعان.
"ەرقايسىنىڭ سالماعى شامامەن 200-220 توننا, اراسىنا ارماتۋرا سالىنعان, بەتوننىڭ ماركاسى ٶتە جوعارى. قۇرىلىس جۇمىستارى كەزٸندە ساپاسىن ماماندار تەكسەرەدٸ. تەحنيكالىق, اۆتورلىق قاداعالاۋ جاسايدى. ول جەردە كٶپتەگەن باقىلاۋ بار", - دەدٸ كٶلگٸنوۆ ورتالىق كوممۋنيكاتسييالار قىزمەتٸندە ٶتكەن بريفينگتە.
ەسكە سالا كەتەيٸك, قاڭتار ايىنىڭ ورتاسىندا BI Group باسشىسى LRT-نٸ ٶز قاراجاتى ەسەبٸنەن دەمونتاج جاساۋدى ۇسىنعان بولاتىن.
"BI قارجىسى ەسەبٸنەن دەمونتاج جاساۋعا دايىنبىز", - دەپ جازدى راحىمباەۆ ەلەۋمەتتٸك جەلٸدە.
بٸراق, كٶلگٸنوۆتىڭ ايتۋىنشا, راحىمباەۆ ونىڭ قانشاعا تٷسەتٸنٸن بٸلگەن سوڭ بۇل يدەيادان باس تارتقان.
"دەمونتاج جاساۋدى ۇسىنعان ادامدار تسيفردى كٶرگەننەن كەيٸن باس تارتتى, وعان 20 ميلليارد تەڭگەگە جۋىق قارجى كەرەك", - دەپ تولىقتىردى ەكٸم.
ايتا كەتەرٸ, LRT قۇرىلىسىن اياقتاۋ ٷشٸن 577 ميلليون دوللار كەرەك. ەلوردا ەكٸمشٸلٸگٸ LRT قۇرىلىسىن اياقتاۋ قاجەت دەپ ەسەپتەيدٸ.
قازٸردٸڭ ٶزٸندە 500-دەن استام LRT باعانى بوي كٶتەرگەن. ولاردى بۇزۋ ٷشٸن 20 ميلليارد تەڭگەگە جۋىق قارجى قاجەت. ال LRT قۇرىلىسىنا قوماقتى قارجى جۇمسالىپ قويعاندىقتان (كەلٸسٸمشارتتىڭ قۇنى 1,8 ميلليارد دوللار), باعانداردى بۇزۋ ورىنسىز.
