بەلگٸلٸ اكتريسا شولپان ەلگەزەك پەن تاعى دا ەكٸ ادامنىڭ ٶلٸمٸنە كٷدٸكتٸ Gelandewagen جٷرگٸزۋشٸسٸنٸڭ جول اپاتى ورىن الار الدىندا قايدا بولعانى انىقتالدى, دەپ حابارلايدى قازاقپارات تٸلشٸسٸ.
قايعىلى وقيعانىڭ جاي-جاپسارى تۋرالى قالالىق پوليتسييا دەپارتامەنتٸ ايتىپ بەردٸ.
«Gelandewagen كٶلٸگٸن تٸزگٸندەگەن ماس ادامنىڭ اباي كٶشەسٸندە ميتسۋبيسي گالانتتى سوعىپ, ٷش ادامنىڭ ٶمٸرٸنٸڭ قيىلۋىنا سەبەپكەر بولعانىن بٸلەمٸز. بٸراق سول جٷرگٸزۋشٸنٸڭ «Grand Opera» تٷنگٸ كلۋبىندا اراق ٸشٸپ, كلۋبتان ماس كٷيٸندە شىققانىن بٸرەۋ بٸلسە, بٸرەۋ بٸلمەيدٸ. تٷنگٸ كلۋبتار مەن بارلاردىڭ قوجايىندارى كٶپ جاعدايلاردا قۇقىق بۇزۋشىلىقتارعا جول بەرٸپ جاتادى», - دەدٸ قالالىق پوليتسييا دەپارتامەنتٸ باسشىسىنىڭ ورىنباسارى ٸزباسار بەكتۇروۆ.
پوليتسييا ٶكٸلٸنٸڭ ايتۋىنشا, قالاداعى كٶپتەگەن قۇقىقبۇزۋشىلىقتار كٶڭٸل كٶتەرەتٸن ورىنداردىڭ باسشىلارىنىڭ جاۋاپسىزدىعىنان بولىپ وتىر.
بىلتىردىڭ ٶزٸندە تٷنگٸ كلۋبتار مەن دەمحانالاردان پوليتسيياعا 2 مىڭعا جۋىق قوڭىراۋ تٷسكەن. كلۋب باسشىلارى كليەنتتەردٸڭ كٶپشٸلٸگٸ ٶز كٶلٸگٸمەن كەلگەنٸن كٶرە تۇرا, ولارعا الكوگولدٸ ٸشٸمدٸك ساتا بەرەدٸ.
«جاڭا جىل تٷنٸ قارساڭىندا «پيونەرسكايا پراۆدا» تٷنگٸ كلۋبىندا كەلۋشٸلەر ٶزارا داۋ-جانجال شىعارعان. سونىڭ سالدارىنان كلۋبقا كەلۋشٸلەردٸڭ بٸرٸ اۋىر جاراقات الىپ, كٶز جۇمعان. سونىمەن قاتار, «چۋكوتكا» بارىنىڭ قاسىندا بولعان تٶبەلەستەن دە بٸر ەر ادام مەرت بولعانى بەلگٸلٸ. وعان قاراماستان ول كلۋب ماڭىندا ەلٸ دە ۇرىس-تٶبەلەس تولاستار ەمەس. وسىنداي كەلەڭسٸز وقيعالار كلۋب ەكٸمشٸلٸگٸنٸڭ دۇرىس جۇمىس جاساماۋىنان ورىن الادى», - دەدٸ پولكوۆنيك بەكتۇروۆ.
تەرتٸپ ساقشىسى كلۋب قوجايىندارىنىڭ كٷزەتشٸلەردٸ كٶشەدەن جالدايتىنىن تاعى اتاپ ٶتتٸ.
«مەكەمەلەردٸڭ 50 پايىزى كٷزەت قىزمەتٸن سىرتتان جالدايدى. ولاردىڭ كٶپشٸلٸگٸنٸڭ داۋ-جانجالدى ۋشىقتىرماي شەشۋدە تەجٸريبەسٸ جوق. وسىدان 1 اي بۇرىن «ەۆەرييا» دەمحاناسىندا 1 بويجەتكەن كٶز جۇمدى. دەمحانادا قاۋٸپسٸزدٸك شارالارىن تەك 1 عانا كٷزەتشٸ قاداعالاعان. بۇل قىزمەتكەردٸڭ ليتسەنزيياسى بولماعاندىقتان, ول قاجەتتٸ قاۋٸپسٸزدٸك شارالارىن قابىلداي المادى», - دەدٸ ول.
ايتا كەتۋ كەرەك, پوليتسييا قالاداعى ەڭ كريمينوگەندٸ دەمالىس ورىندارىنىڭ تٸزٸمٸن جارييالاعان بولاتىن.
