قازاقستاندىق اكتريسا, پروديۋسەر بايان الاگٶزوۆا Instagram پاراقشاسىندا كارديولوگييا بٶلٸمٸنە تٷسٸپ, ەم-دوم الىپ جاتقانىن حابارلادى, دەپ جازادى Sputnik قازاقستان.
"سٸزدەرگە كارديولوگييا بٶلٸمٸنٸڭ پالاتاسىنان جازىپ وتىرمىن. ٶزٸم دەرٸ تامىزعىشتى فوتوعا تٷسٸرٸپ, پوست ارقىلى بٸرەۋگە شاعىمدانعاندى ۇناتپايمىن. دەل قازٸر جاي بالكوندا سۋبۇرقاققا قاراپ وتىرمىن. رەلاكس تا بار. ٶيتكەنٸ بٸزدٸڭ دەرٸگەرلەر ٶز جۇمىسىن بٸلەدٸ. بٸر-ەكٸ رەت دەرٸ ەكتٸ, تابلەتكا ٸشتٸم. وسىدان كەيٸن جاتىپ, دەمالعىڭ كەلەدٸ ەكەن", - دەپ جازدى الاگٶزوۆا.
ەرتەڭ وعان ۋلترادىبىستىق زەرتتەۋدەن ٶتۋ كەرەك. ودان كەيٸن تاعى بٸرنەشە اناليز تاپسىرادى. اكتريسا قازٸرگٸ جاعدايدى تىلسىم كٷشتەردٸڭ بەلگٸسٸ دەپ سانايدى. سەبەبٸ اۋرۋحاناعا تٷسكەن ادام جالعىز ٶزٸ وتىرىپ, كٶپ نەرسەنٸ وي-ەلەگٸنەن ٶتكٸزە الادى. ال كٷيبەڭ تٸرشٸلٸك كەزٸندە "جۇمىس-وتباسى" دەپ شاپقىلاي بەرەدٸ.
"سول كەزدە سان الۋان جاعدايعا تاپ بولاسىڭ. بٸر جەردە كومپروميس بولادى, ەندٸ بٸر جەردە يٸلٸپ ٶتەسٸڭ. سىناتىن كەزدەرٸڭ دە بولادى. ٶيتكەنٸ بەرٸنە "جاقسى" بولۋعا تىرىساسىڭ. بەلكٸم, جاقسى, ەدەپتٸ, ينتەلليگەنتتٸ بولۋدىڭ قاجەتٸ جوق. وندايدا ادامدار سەنٸ ەلسٸز دەپ, پايدالانىپ كەتۋگە تىرىسادى. جوق, بۇل ەلسٸزدٸك ەمەس, بۇل – كٷش", - دەيدٸ الاگٶزوۆا.
وسى ورايدا پروديۋسەر "ادام قۇرمەتكە بٶلەنگٸسٸ كەلسە, الدىمەن ٶزٸ قۇرمەتتەۋدٸ بٸلۋگە تيٸس" دەگەن ويىن دا جەتكٸزدٸ. سول سيياقتى جاقسى كٶرسٸن دەسە, ٶزٸ جاقسى كٶرۋٸ كەرەك.
"ال قابىلداسىن دەسە, الدىمەن ٶزٸ قابىلداۋى كەرەك. باسقاشا بولمايدى. مەندە دەل وسى رەسۋرس تاۋسىلىپ قالعان تەرٸزدٸ. بٸراق سەنٸم – ادامدارعا دەگەن سەنٸم سارقىلعان جوق. ول ماعان ماحابباتتى دا, قۇرمەتتٸ دە, قابىلداۋدى دا سىيلادى, ٶزٸم بولمىسىمدى جوعالتپاۋعا كٷش بەرەدٸ. ٶكٸنٸشكە قاراي ادامنىڭ جٷرەگٸ تەمٸردەن ەمەس. بٸراق دەل سولاي بولعانىن قاتتى قالايمىن. اشىق ايتايىن, ماعان وڭاي ەمەس, كەي كەزدە ٶتە اۋىر بولادى. بٸراق بۇل بٸرەۋدٸڭ ٶمٸرٸ, تاعدىرى عانا. ونىڭ دا قاۋانىشى مەن مۇڭى بار. عالامشارداعى تاعى بٸر قۇم ۇنتاعى ٸسپەتتٸ. بٸراق ول – مەنٸڭ ٶمٸرٸم, مەنٸڭ تاعدىرىم. مەن ونى جاقسى كٶرەمٸن", - دەپ جازدى الاگٶزوۆا.
