Qazaqstandyq aktrisa, prodiýser Baian Alagózova Instagram paraqshasynda kardiologiia bólimine túsip, em-dom alyp jatqanyn habarlady, dep jazady Sputnik Qazaqstan.
"Sizderge kardiologiia bóliminiń palatasynan jazyp otyrmyn. Ózim dári tamyzǵyshty fotoǵa túsirip, post arqyly bireýge shaǵymdanǵandy unatpaimyn. Dál qazir jai balkonda sýburqaqqa qarap otyrmyn. Relaks ta bar. Óitkeni bizdiń dárigerler óz jumysyn biledi. Bir-eki ret dári ekti, tabletka ishtim. Osydan keiin jatyp, demalǵyń keledi eken", - dep jazdy Alagózova.
Erteń oǵan ýltradybystyq zertteýden ótý kerek. Odan keiin taǵy birneshe analiz tapsyrady. Aktrisa qazirgi jaǵdaidy tylsym kúshterdiń belgisi dep sanaidy. Sebebi aýrýhanaǵa túsken adam jalǵyz ózi otyryp, kóp nárseni oi-eleginen ótkize alady. Al kúibeń tirshilik kezinde "jumys-otbasy" dep shapqylai beredi.
"Sol kezde san alýan jaǵdaiǵa tap bolasyń. Bir jerde kompromis bolady, endi bir jerde iilip ótesiń. Synatyn kezderiń de bolady. Óitkeni bárine "jaqsy" bolýǵa tyrysasyń. Bálkim, jaqsy, ádepti, intelligentti bolýdyń qajeti joq. Ondaida adamdar seni álsiz dep, paidalanyp ketýge tyrysady. Joq, bul álsizdik emes, bul – kúsh", - deidi Alagózova.
Osy oraida prodiýser "adam qurmetke bólengisi kelse, aldymen ózi qurmetteýdi bilýge tiis" degen oiyn da jetkizdi. Sol siiaqty jaqsy kórsin dese, ózi jaqsy kórýi kerek.
"Al qabyldasyn dese, aldymen ózi qabyldaýy kerek. Basqasha bolmaidy. Mende dál osy resýrs taýsylyp qalǵan tárizdi. Biraq Senim – adamdarǵa degen Senim sarqylǵan joq. Ol maǵan mahabbatty da, qurmetti de, qabyldaýdy da syilady, ózim bolmysymdy joǵaltpaýǵa kúsh beredi. Ókinishke qarai adamnyń júregi temirden emes. Biraq dál solai bolǵanyn qatty qalaimyn. Ashyq aitaiyn, maǵan ońai emes, kei kezde óte aýyr bolady. Biraq bul bireýdiń ómiri, taǵdyry ǵana. Onyń da qaýanyshy men muńy bar. Ǵalamshardaǵy taǵy bir qum untaǵy ispetti. Biraq ol – meniń ómirim, meniń taǵdyrym. Men ony jaqsy kóremin", - dep jazdy Alagózova.
