قر باس پروكۋراتۋراسىنىڭ قوعامدىق مٷددەلەردٸ قورعاۋ قىزمەتٸنٸڭ باستىعى ساپاربەك نۇرپەيٸسوۆ سايلاۋدان كەيٸنگٸ شەرۋلەرگە قاتىسقان ادامداردىڭ قانشاسى قاماۋعا الىنعانىن ايتتى, دەپ حابارلايدى قازاقپارات تٸلشٸسٸ.
ونىڭ ايتۋىنشا, زاڭسىز اكتسييالار مەن شەرۋلەرگە قاتىسقانى ٷشٸن سوت شەشٸمٸمەن 957 ادام ەكٸمشٸلٸك جاۋاپقا تارتىلعان.
«باس پروكۋراتۋرا رۇقسات ەتٸلمەگەن اكتسييا, شەرۋلەرگە قاتىسۋ زاڭسىز ەكەنٸن بٸرنەشە مەرتە ەسكەرتتٸ. ارانداتۋعا بوي الدىرعان وتانداستارىمىز بٸرنەشە قالادا قارسىلىق اكتسييالارىنا شىقتى. سالدارىنان 3 پوليتسييا قىزمەتكەرٸ دەنە جاراقاتىن الدى. دەگەنمەن, پوليتسييا ۇستامدىلىق تانىتىپ, ارنايى زاتتاردى قولدانبادى», - دەدٸ باس پروكۋراتۋرا ٶكٸلٸ.
ساپاربەك نۇرپەيٸسوۆ سولاردىڭ ٸشٸندە 670 ادام قاماققا الىنىپ, 115 ادامعا ايىپپۇل سالىنعانىن, ال 172 ادامعا ەسكەرتۋ جاسالعانىن ايتادى.
«قاداعالاۋ ٶكٸلەتتٸگٸ اياسىندا پروكۋراتۋرا ۇستالعانداردىڭ زاڭسىز ەرەكەتٸن تٷسٸنە وتىرىپ, وتباسىلىق جاعدايىن ەسكەرٸپ, سوت ورىندارىنا 311 ادامنىڭ قاماۋ مەرزٸمٸن قىسقارتۋ بويىنشا ۇسىنىم حات جٸبەردٸ. 63 ادام بٷگٸن شىعادى. قازٸر قاماقتا 180 ادام بار. ونىڭ 80-ٸ - نۇر-سۇلتان قالاسىندا, 100-ٸ - الماتىدا قاماۋدا. ولاردى قاماۋ مەرزٸمٸ - 6-15 كٷن ارالىعىندا», - دەدٸ ساپاربەك نۇرپەيسٸوۆ.
