دٷنيەجٷزٸلٸك دوپينگكە قارسى اگەنتتٸك (WADA) رەسەيگە مەسكەۋ زەرتحاناسىنداعى دوپينگ سىناماسى دەرەكتەرٸن بۇرمالاۋ جايلى جورامالدارعا بايلانىستى تٷسٸنٸكتەمە بەرۋگە ٷش اپتا ۋاقىت بەرگەن. بۇل تۋرالى دوپينگكە قارسى ۇلتتىق اگەنتتٸكتەر ينستيتۋتىنىڭ باسشىسى مايكل اسكٸگە سٸلتەمە جاساعان دانييالىق Sports Press باسىلىمى حابارلادى.
مەسكەۋدٸڭ دوپينگكە قارسى زەرتحاناسى WADA ۇيىمىنىڭ دوپينگ سىنامالارى تۋرالى دەرەكتەردٸ بەرمەس بۇرىن ولاردى ٶزگەرتكەن بولۋى مٷمكٸن دەگەن كٷدٸككە ٸلٸككەنٸ تۋرالى نەمٸستٸڭ Frankfurter Allgemeine باسىلىمى دا جازعان. ARD تەلەارناسىنىڭ حابارلاۋىنشا, WADA مەسكەۋلٸك زەرتحانا سوڭعى بٸر جارىم جىل بويى رەسەيلٸك سپورتشىلاردىڭ جٷيەلٸ تٷردە دوپينگ قولداناتىنىن جاسىرۋ ماقساتىندا سىناما تۋرالى دەرەكتەردٸ بۇرمالاپ كەلگەن بولۋى مٷمكٸن دەپ سەزٸكتەنەدٸ.
بۇعان دەيٸن بريتاندىق The Telegraph باسىلىمى, ەگەر دوپينگ سىنامالارى تۋرالى دەرەكتەردٸڭ بۇرمالانعانى راستالسا, وندا رەسەيدٸڭ دوپينگكە قارسى اگەنتتٸگٸنٸڭ جۇمىسى ۋاقىتشا توقتاتىلىپ, رەسەيلٸك سپورتشىلار 2020 جىلى توكيو وليمپياداسىنان شەتتەتٸلەدٸ دەپ جازدى.
رەسەيدٸڭ وليمپيادا كوميتەتٸ الداعى وليمپيادا ويىندارىنان ۇلتتىق قۇراما شەتتەتٸلۋٸ ىقتيمال دەگەن اقپاراتقا بايلانىستى تٷسٸنٸكتەمە بەرۋدەن باس تارتتى. رەسەيدٸڭ دوپينگكە قارسى اگەنتتٸگٸ (رۋسادا) ٶكٸلدەرٸ باتىس جۋرناليستەرٸ رەسەيلٸك سپورتشىلار تۋرالى «ەدەيٸ شۋ شىعارادى» دەپ سانايدى.
23 قىركٷيەكتە توكيودا ٶتەتٸن جيىندا WADA ۇيىمى اتقارۋ كوميتەتٸنە مەسكەۋدٸڭ دوپينگكە قارسى زەرتحاناسىنىڭ قىزمەتٸ تۋرالى ەسەپ ۇسىنىلادى دەپ حابارلاندى.
