ازاپتاۋلار جەنە ٶكٸلەتتٸگٸن اسىرا پايدالانۋ فاكتٸلەرٸ بويىنشا 243 قىلمىستىڭ ٸس تٸركەلدٸ. بۇل تۋرالى مەجٸلٸستٸڭ جالپى وتىرىسىندا قازاقستانداعى ادام قۇقىقتارى جٶنٸندەگٸ ۋەكٸل ەلۆيرا ەزٸموۆا ايتتى, دەپ حابارلايدى قازاقپارات.
«مەنٸڭ اتىما كەلٸپ تٷسكەن ازاماتتاردىڭ 137 ٶتٸنٸشٸنٸڭ ٸشٸندە 86-سى ازاپتاۋ نەمەسە باسقا قاتىگەزدٸك ەرەكەتتەرگە بايلانىستى. رەسمي ستاتيستيكاعا سٷيەنسەك, 2022 جىلى 13 ناۋرىزداعى ازاپتاۋلار جەنە ٶكٸلەتتٸگٸن اسىرا پايدالانۋ فاكتٸلەرٸ بويىنشا 243 قىلمىستىق ٸس تٸركەلدٸ. قازٸرگٸ ۋاقىتتا بٸز قۇقىق قورعاۋ ورگاندارىمەن ازاپتاۋلار ٷشٸن جاۋاپكەرشٸلٸكتٸ قاتاڭداتۋ جەنە ولارعا جول بەرمەۋ تەتٸكتەرٸن ەنگٸزۋ مەسەلەسٸن تالقىلاۋدامىز. زاڭ بويىنشا ازاپتاۋدى زورلىق-زومبىلىقتى, قورقىتۋدى, سول سيياقتى ٶزگە دە قاتىگەز قارىم-قاتىناستى قولدانىلىپ الىنعان دەلەلدەمەلەر جارامسىز دەپ تانىلادى. وسىعان بايلانىستى ۇستاۋ مەن تەرگەۋدٸڭ رۇقسات ەتٸلمەگەن ەدٸستەرٸ تۋرالى ٸستەردٸ تەرگەۋدٸ كەشٸكتٸرمەۋ ٶتە ماڭىزدى», - دەدٸ ول قاڭتار وقيعالارىنا قاتىستى مەسەلەلەر كٶتەرٸلگەن وتىرىستا.
ونىڭ اتاپ ٶتۋٸنشە, الداعى سوت پروتسەستەرٸنٸڭ اشىقتىعى جەنە وعان تەۋەلسٸز باقىلاۋشىلاردىڭ قاتىسۋى مەسەلەسٸ دە ٶزەكتٸ.
«بۇل مەسەلە بويىنشا مەن جوعارعى سوت تٶراعاسىنا جەنە باس پروكۋرورعا جٷگٸندٸم. سول قايعىلى وقيعالارعا بايلانىستى ادام ٶمٸرٸنە قاۋٸپتٸڭ جوعارى دەڭگەيٸ بولعانى انىق. جاپپاي تەرتٸپسٸزدٸك سالدارىنان مىڭنان استام ازامات تٷرلٸ دەرەجەدە جاراقات الدى. ونىڭ ٸشٸندە مىڭنان استام ازامات پەن 3 مىڭنان استام قۇقىق قورعاۋ ورگاندارىنىڭ قىزمەتكەرٸ بار. 238 ادام مەرت بولدى», - دەدٸ ەلۆيرا ەزٸموۆا.
