اتىراۋ وبلىسى ەكٸمٸنٸڭ قوس ورىنباسارى - سەرٸك ايداربەكوۆ پەن ناريمان تاۋشوۆ جۇمىستان قىسقارتىلدى, - دەپ حابارلايدى "ۇلت اقپارات" وبلىس ەكٸمٸنٸڭ باسپاسٶز قىزمەتٸنە سٸلتەمە جاساپ.
"مەملەكەت باسشىسىنىڭ 2022 جىلعى 16 ناۋرىزداعى جولداۋىندا ايتىلعان وبلىستار مەن رەسپۋبليكالىق ماڭىزى بار قالالار ەكٸمدەرٸ اپپاراتتارىنداعى مەملەكەتتٸك قىزمەتشٸلەردٸڭ سانىن وڭتايلاندىرۋ ماقساتىندا اتىراۋ وبلىسى ەكٸمٸ ورىنباسارلارىنىڭ شەكتٸ سانى ەكٸ شتاتتىق لاۋازىمعا قىسقارتىلدى.
وسىعان بايلانىستى وبلىس ەكٸمٸنٸڭ ەكٸ ورىنباسارى - سەرٸك ايداربەكوۆ پەن ناريمان تاۋشوۆتىڭ لاۋازىمدارى قىسقارتىلدى", - دەلٸنگەن حابارلامادا.
ايتا كەتەيٸك, سەرٸك ايداربەكوۆ 2020 جىلدىڭ قازانىنان بەرٸ اتىراۋ وبلىسى ەكٸمٸنٸڭ بٸرٸنشٸ ورىنباسارى قىزمەتٸن اتقارعان. بۇل قىزمەتكە دەيٸن ول ٷش جىل مەجٸلٸس اپپاراتىن باسقارعان.
ناريمان تاۋشوۆ 2021 جىلدىڭ ناۋرىزىنان باستاپ وبلىس ەكٸمٸنٸڭ ورىنباسارى قىزمەتٸن اتقارعان. ول بۇعان دەيٸن اتىراۋ وبلىسى بويىنشا تەكسەرۋ كوميسسيياسىنىڭ تٶراعاسى قىزمەتٸن اتقارعان. اۋعان سوعىسىنىڭ ارداگەرٸ.
