قىرعىزستان پرەزيدەنت سايلاۋىنا تٷسٸپ جاتقان كانديدات ومۋربەك بابانوۆ سايلاۋ كەزٸندە بولعان زاڭ بۇزۋ وقيعالارى جٶنٸندە مەلٸمدەمە جاسادى. ول سايلاۋ ەدٸل ەرٸ اشىق ٶتتٸ دەپ سانامايتىنىن ايتتى.
بابانوۆ «كانديداتتىعىمدى ۇسىنباي تۇرىپ پرەزيدەنتپەن اقىلداسقان ەدٸم. ول باتاسىن بەرٸپ, "يە, پرەزيدەنت سايلاۋىنا تٷس. بٸز ٶز كانديداتىمىزدى ۇسىنامىز, سەن دە قاتىس. جەڭگەن ادام پرەزيدەنت بولسىن" دەگەن. كۋەلەر بار. ول سايلاۋ ەدٸل ٶتەدٸ دەگەن ۋەدە بەرگەن. بٸراق تەڭ جاعداي جاسالمادى. كەيٸنگٸ اپتادا المازبەك شارشەنوۆيچ اتامباەۆقا اقپاراتتى دۇرىس بەرمەگەن. قىرعىزستاننىڭ ۇلتتىق قاۋٸپسٸزدٸك كوميتەتٸ مەن ميليتسييا ونى جالعان اقپاراتپەن اداستىرىپ وتىر. مەن ونىڭ بٷگٸنگٸ سٶزدەرٸنە قاتتى قاپا بولدىم» دەدٸ.
قىرعىزستاندا بٷگٸن پرەزيدەنت سايلاۋى ٶتٸپ جاتىر.
پرەزيدەنت المازبەك اتامباەۆ سايلاۋ ۋچاسكەسٸندە داۋىس بەرٸپ شىققاننان كەيٸن جۋرناليستەر ساۋالدارىنا جاۋاپ بەردٸ. ول «تۋرا بٸر جارىم اي بۇرىن بابانوۆتىڭ ماعان كٷيە جاعا باستاعانىن بايقادىم. مەنٸ "اعا" دەپ جٷرەتٸن بابانوۆ. بابانوۆتاي مەنٸ ماقتاعان ادامدى كٶرمەدٸم. سٸزدٸڭ جولىڭىزدى مەن عانا جالعاستىرام دەپ جٷرەتٸن بابانوۆ اياقاستىنان "ولار باسقا جولمەن كەتٸپ بارادى" دەپ قالىپتى. ول ول ما, اشىق ايتايىن, ماعان بابانوۆتىڭ اتىنان بٸر وليگارح كەلٸپ 20 ميلليون دوللار ۇسىندى. مەن وعان, قىمباتتىم, ساتىلمايتىن زاتتار بار دەدٸم» دەدٸ.
