تۇڭعىش عارىشكەر ەيەل, رەسەيدٸڭ مەملەكەتتٸك دۋماسىنىڭ دەپۋتاتى ۆالەنتينا تەرەشكوۆا قازاقستاندىقتاردى ەلوردا كٷنٸمەن قۇتتىقتاپ, وعان قازاقستان پرەزيدەنتٸ نۇرسۇلتان نازارباەۆتىڭ ەسٸمٸن بەرۋدٸ ۇسىندى, دەپ حابارلايدى sputniknews.kz.
"استاناداي تاماشا قالانىڭ تۇرعىندارىن, بٷكٸل قازاقستاندىقتاردى وسى بٸر ايتۋلى كٷن – قالانىڭ 20 جىلدعىمەن شىن جٷرەكتەن قۇتتىقتايمىن. بۇل نۇرسۇلتان نازارباەۆ سالعان قالا. استانا دەپ ەمەس, پرەزيدەنتتەرٸڭٸزدٸڭ ەسٸمٸمەن اتاۋ كەرەك دەپ سانايمىن. بٸز ول كٸسٸنٸ قاتتى جاقسى كٶرەمٸز, بٸزدٸڭ پرەزيدەنتٸمٸز ۆلاديمير ۆلاديميروۆيچ پۋتين مەن نۇرسۇلتان ەبٸشۇلىنىڭ دوستىق قارىم-قاتىناستا بولعانىن ماقتان تۇتامىز. ٶتە قۋانىشتىمىز!", — دەدٸ تەرەشكوۆا مەملەكەتتٸك دۋمانىڭ استاناعا جۇمىس ساپارى كەزٸندە.
2016 جىلى قازاقستاندىق دەپۋتاتتار قازاقستان تەۋەلسٸزدٸگٸنٸڭ 25 جىلدىعى دەكلاراتسيياسىندا ەلوردانى قازاقستاننىڭ تۇڭعىش پرەزيدەنتٸ ەسٸمٸمەن اتاۋدى ۇسىنعان بولاتىن. استانانىڭ اتاۋىن ٶزگەرتۋگە ەكٸ نۇسقا بولدى: "نۇرسۇلتان" نەمەسە "نازارباەۆ". مەملەكەت باسشىسى بۇل يدەيانى قولدامادى.
2017 جىلى ناۋرىزدا پارلامەنت دەپۋتاتتارى تاعى دا استانانى ەلباسىنىڭ قۇرمەتٸنە اتاۋدى ۇسىنعان. الايدا يدەيا ول جولى دا قولداۋ تاپپادى.
سول جىلى جەلتوقساندا تۇڭعىش پرەزيدەنت كٷنٸ قارساڭىندا الماتىدا فۋرمانوۆ كٶشەسٸنٸڭ اتاۋى ٶزگەرتٸلٸپ, نۇرسۇلتان نازارباەۆتىڭ ەسٸمٸ بەرٸلدٸ.
اتاپ ٶتسەك, قازاقستاندا دا, ٶزگە ەلدەردە دە ەلباسىنىڭ ەسٸمٸمەن اتالعان نىساندار ٶتە كٶپ: نازارباەۆ زيياتكەرلٸك مەكتەپتەرٸ, نازارباەۆ ۋنيۆەرسيتەتٸ, الماتى تاۋلارىنداعى نۇرسۇلتان شىڭى.
گوللاندييا مەن جاپونييادا قىزعالداقتار مەن حريزانتەمانىڭ جاڭا تٷرٸنە قازاقستان پرەزيدەنتٸنٸڭ ەسٸمٸ بەرٸلگەن.
تٷركييادا دا ەلباسىنىڭ بەدەلٸ جوعارى – بۇل ەلدە ونىڭ قۇرمەتٸنە ەسكەرتكٸش تۇرعىزىلىپ, تٶرت قالاداعى داڭعىلدارعا ەسٸمٸ بەرٸلگەن.
سونىمەن بٸرگە, شەشەنستان استاناسى گروزنىيدا نازارباەۆ اتىنداعى ليتسەي بار.
