Tuńǵysh ǵaryshker áiel, Reseidiń Memlekettik dýmasynyń depýtaty Valentina Tereshkova qazaqstandyqtardy elorda kúnimen quttyqtap, oǵan Qazaqstan prezidenti Nursultan Nazarbaevtyń esimin berýdi usyndy, dep habarlaidy sputniknews.kz.
"Astanadai tamasha qalanyń turǵyndaryn, búkil qazaqstandyqtardy osy bir aitýly kún – qalanyń 20 jyldǵymen shyn júrekten quttyqtaimyn. Bul Nursultan Nazarbaev salǵan qala. Astana dep emes, prezidentterińizdiń esimimen ataý kerek dep sanaimyn. Biz ol kisini qatty jaqsy kóremiz, bizdiń prezidentimiz Vladimir Vladimirovich Pýtin men Nursultan Ábishulynyń dostyq qarym-qatynasta bolǵanyn maqtan tutamyz. Óte qýanyshtymyz!", — dedi Tereshkova Memlekettik dýmanyń Astanaǵa jumys sapary kezinde.
2016 jyly qazaqstandyq depýtattar Qazaqstan táýelsizdiginiń 25 jyldyǵy deklaratsiiasynda elordany Qazaqstannyń tuńǵysh prezidenti esimimen ataýdy usynǵan bolatyn. Astananyń ataýyn ózgertýge eki nusqa boldy: "Nursultan" nemese "Nazarbaev". Memleket basshysy bul ideiany qoldamady.
2017 jyly naýryzda parlament depýtattary taǵy da Astanany Elbasynyń qurmetine ataýdy usynǵan. Alaida ideia ol joly da qoldaý tappady.
Sol jyly jeltoqsanda Tuńǵysh prezident kúni qarsańynda Almatyda Fýrmanov kóshesiniń ataýy ózgertilip, Nursultan Nazarbaevtyń esimi berildi.
Atap ótsek, Qazaqstanda da, ózge elderde de Elbasynyń esimimen atalǵan nysandar óte kóp: Nazarbaev ziiatkerlik mektepteri, Nazarbaev ýniversiteti, Almaty taýlaryndaǵy Nursultan shyńy.
Gollandiia men Japoniiada qyzǵaldaqtar men hrizantemanyń jańa túrine Qazaqstan prezidentiniń esimi berilgen.
Túrkiiada da Elbasynyń bedeli joǵary – bul elde onyń qurmetine eskertkish turǵyzylyp, tórt qaladaǵy dańǵyldarǵa esimi berilgen.
Sonymen birge, Sheshenstan astanasy Groznyida Nazarbaev atyndaǵy litsei bar.
