بٷگٸن ەلوردادا «نۇر وتان» پارتيياسى اتىنان الداعى سايلاۋدا قازاقستان پرەزيدەنتتٸگٸنە ٷمٸتكەر قاسىم-جومارت توقاەۆتى قولداۋشىلاردىڭ فورۋمى ٶتتٸ, دەپ حابارلايدى قازاقپارات تٸلشٸسٸ.
فورۋمعا قر تۇڭعىش پرەزيدەنتٸ-ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆ كەلدٸ. «سارىارقا» ۆەلوترەگٸ عيماراتىندا ٶتكەن وسى اۋقىمدى شاراعا ەل ٶڭٸرلەرٸنەن كەلگەن جاستار ۇيىمدارىنىڭ ٶكٸلدەرٸ, ەلورداداعى جوو-لار ستۋدەنتتەرٸ, پارلامەنت دەپۋتاتتارى, قوعام جەنە مەملەكەت قايراتكەرلەرٸ, ٶنەر جۇلدىزدارى, تانىمال سپورتشىلار قاتىستى.
فورۋم كەزٸندە قازاقستاننىڭ ەربٸر قالاسىنان سايلاۋعا بايلانىستى جولدانعان قۇتتىقتاۋلارعا ارنالعان ۆيدەوروليكتەر كٶرسەتٸلدٸ.
«بٷگٸن بٸز اسا ماڭىزدى سەتتٸڭ الدىندا تۇرمىز. 9 ماۋسىمدا ەلٸمٸز ٶز بولاشاعى ٷشٸن داۋىس بەرەدٸ. بٸز بٸرگەمٸز! بٸزدٸڭ كٷشٸمٸز بٸرلٸكتە! بٸرلٸك بار جەردە - تٸرلٸك بار!», - دەدٸ قاسىم-جومارت توقاەۆ.
وسى ورايدا مەملەكەت باسشىسى «Nur Otan» پارتيياسى ناۋقان كەزٸندە ٷلكەن جۇمىستاردى اتقارعانىن ايتا كەلە: «سەنٸمدٸ ٶكٸلدەرٸمە, مىڭداعان ۆولونتەرلەرگە, قوعامدىق شتابتاردىڭ بارلىق مٷشەلەرٸنە العىس ايتامىن. بٸز بٷكٸل ەل بويىنشا جٷز مىڭنان استام ٸس-شارا ٶتكٸزدٸك. بارشالارىڭىزعا ٷلكەن ريزاشىلىعىمدى بٸلدٸرەمٸن», - دەدٸ.
بٷگٸنگٸ فورۋم ەلٸمٸزدٸڭ ٶڭٸرلەرٸنەن ارنايى كەلگەن ٶنەر جۇلدىزدارىنىڭ ٷلكەن كونتسەرتٸنە ۇلاستى.
