بوكستان 2023 جىلعى ەلەم چەمپيونى, قازاقستان ۇلتتىق قۇراماسىنىڭ بۇرىنعى كاپيتانى اسلانبەك شىمبەرگەنوۆ سپورتتىق مانسابىن اياقتاۋ تۋرالى شەشٸم قابىلدادى, دەپ حابارلايدى ult.kz.
بۇل تۋرالى سپورتشى Sportbugin.kz تٸلشٸسٸنە بەرگەن سۇحباتىندا ايتتى.
اسلانبەك شىمبەرگەنوۆتٸڭ سٶزٸنشە, ول شارشى الاڭعا قايتا ورالۋدى جوسپارلاعان. تٸپتٸ جاتتىعۋعا كٸرٸسٸپ, كەسٸبي بوكستاعى مانسابىن جالعاستىرۋعا تالپىنىپ كٶرگەن.
الايدا سپورتشى كەيٸن بۇل ويىن جٷزەگە اسىرا المايتىنىن تٷسٸنگەن.
«بٸراق قولىم جٷرمەدٸ. سوندىقتان كەسٸبي مانسابىمدى اياقتايمىن دەپ شەشتٸم. بٷگٸندە جامبىل وبلىسىنداعى كەسٸبي بوكس كلۋبىندا باسشىنىڭ ورىنباسارى بولىپ جۇمىس ٸستەپ جٷرمٸن», – دەدٸ ول.
اسلانبەك شىمبەرگەنوۆ 1993 جىلعى 9 قازاندا جامبىل وبلىسىندا دٷنيەگە كەلگەن. ول بٸرنەشە جىل بويى قازاقستان ۇلتتىق قۇراماسىنىڭ ساپىندا ٶنەر كٶرسەتٸپ, ەل بوكسىنىڭ كٶشباسشىلارىنىڭ بٸرٸ بولدى.
سپورتشى – قازاقستاننىڭ ەكٸ دٷركٸن چەمپيونى. ول 2022 جىلى ازييا چەمپيوناتىندا جەڭٸمپاز اتانسا, 2023 جىلى ەلەم چەمپيوناتىندا توپ جاردى. سونداي-اق 2019 جىلى ەسكەريلەر اراسىنداعى ەلەم چەمپيوناتىندا التىن مەدال يەلەنگەن.
شىمبەرگەنوۆ 2018 جىلعى ازييا ويىندارىندا كٷمٸس, ال 2023 جىلعى ازييا ويىندارىندا قولا جٷلدەگە قول جەتكٸزدٸ. 2024 جىلى پاريجدە ٶتكەن وليمپيادا ويىندارىندا قازاقستان نامىسىن قورعادى.
