الماتىدا 1 قىركٷيەكتەن بەرٸ 74 مىڭنان استام ادام ورۆي-گە (جەدەل رەسپيراتورلىق ۆيرۋس ينفەكتسيياسى) شالدىققان. بۇل بىلتىرعى جىلدىڭ دەل وسى كەزەڭٸمەن سالىستىرعاندا 4 ەسە كٶپ. بۇل جٶنٸندە قالالىق سەس باسشىلارىنا سٷيەنگەن Vlast سايتى جازدى, دەپ حابارلايدى ازاتتىق.
الماتى قالاسىنىڭ سانيتارلىق-ەپيدەميولوگييالىق باقىلاۋ دەپارتامەنتٸ جەتەكشٸسٸنٸڭ ورىنباسارى سەدۋاقاس بايعابىلوۆتىڭ ايتۋىنشا, بيىل كٷزدە تىنىس اۋرۋلارىنا شالدىققاندار كٷرت كٶبەيگەن. 1 قىركٷيەكتەن بەرٸ 74 426 ادام ورۆي-گە شالدىقسا, بىلتىر وسى ۋاقىت ارالىعىندا 17 731 ادام اتالعان اۋرۋمەن اۋىرعان. مامان ورۆي ادامداردىڭ كوروناۆيرۋسپەن كٷرەسۋٸن قيىنداتاتىنىن ايتىپ, ساقتىق شارالارىن ورىنداۋعا ٷندەگەن. ونىڭ ايتۋىنشا, كوروناۆيرۋس كەيدە ورۆي رەتٸندە كەلۋٸ مٷمكٸن.
سەس ٶكٸلٸ الماتىدا تۇماۋ تٸركەلمەگەنٸن, وعان قارسى ۆاكتسينا 105 مىڭ ادامعا ەگٸلگەنٸن ايتقان. ەكپە العانداردىڭ كٶبٸ بيۋدجەت ەسەبٸنەن ۆاكتسينا سالدىرعان.
ورۆي نەمەسە جەدەل رەسپيراتورلىق ۆيرۋس ينفەكتسيياسى – تىنىس ورگاندارىنىڭ ينفەكتسييالىق اۋرۋلار توبى. وعان شالدىققان ادامنىڭ دەنە قىزۋى كٶتەرٸلٸپ, تاماعى اۋىرادى, جٶتەلٸپ, تۇماۋراپ, كٶزٸنەن جاس اعادى.
