مەجٸلٸسكە جاڭا كٶزقاراستاعى جەنە يدەياسى بار ازاماتتار كەلدٸ. ياعني تٶمەنگٸ پالاتا بۇرىنعى فورماتتا جۇمىس ٸستەمەيدٸ.
مەجٸلٸستٸڭ ٸرٸكتەلگەن جاڭا دەپۋتاتتارى جايلى قازاقستان ستراتەگييالىق زەرتتەۋلەر ينستيتۋتى اقپاراتتىق-تالداۋ جۇمىسى بٶلٸمٸ باسشىسىنىڭ ورىنباسارى الماس ارزىقۇلوۆ وسىنداي پٸكٸر بٸلدٸردٸ, دەپ حابارلايدى قازاقپارات.
«بٷگٸن پارتييالار جەڭٸپ العان ورىندارىنا قاراي كٸمدەر دەپۋتات بولاتىنىن جارييا ەتتٸ. ٷش پارتييانىڭ قاي-قايسىسىن الساق تا, قۇرامى 70 پايىزعا جاڭارعانىن كٶرٸپ وتىرمىز. قازاقستان حالىق پارتيياسى بولسىن, اق جول نەمەسە Nur Otan بولسىن قۇرامى بٸرشاما ٶزگەرگەن, پرەزيدەنت تاپسىرعان كۆوتا دەڭگەيٸ ساقتالعان», - دەدٸ الماس ارزىقۇلوۆ قازاقپارات تٸلشٸسٸنە تەلەفون ارقىلى بٸلدٸرگەن پٸكٸرٸندە.
ونىڭ ايتۋىنشا, «Nur Otan» پارتيياسىنان ۇسىنىلعان دەپۋتاتتاردىڭ ٸشٸندە بارلىق سالانىڭ ٶكٸلدەرٸ بار.
«ولاردىڭ ٸشٸندە مەملەكەتتٸك قىزمەتتە جۇمىس ٸستەگەن ازاماتتار, بٸلٸم مەن دەنساۋلىق ساقتاۋ, ٶنەركەسٸپ سالاسىنان دا, ٷكٸمەتتٸك ەمەس ۇيىمداردان دا شىققان ادامدار بارشىلىق. بۇل جەردەگٸ باسا نازار اۋداراتىنى – Nur Otan پارتيياسى جاستار مەن ەيەلدەردٸڭ 30 پايىزدىق كۆوتا بويىنشا تاپسىرماسىن ورىنداپ وتىر. ودان بٶلەك جاڭا كٶزقاراستاعى ازاماتتاردىڭ كەلگەنٸن ايتۋعا بولادى. مەنٸڭ ويىمشا, مەجٸلٸس ەندٸ بۇرىنعى فورماتتا جۇمىس ٸستەمەيدٸ. جاڭا ادامدار جاڭا كٶزقاراسپەن, جاڭا يدەيامەن, جاڭا جوبالارىمەن كەلەدٸ. ولار ساياساتتى بۇرىنعىدان قاراعاندا باسقاشا جٷرگٸزەدٸ دەگەن ويدامىن», - دەيدٸ ساراپشى.
ول ۇلتتىق كەڭەس مٷشەلەرٸ قاتارىنان كەلگەن ازاماتتاردىڭ مەجٸلٸستەگٸ جۇمىس انىق بايقالار دەپ ٷمٸت بٸلدٸردٸ.
«ۇلتتىق كەڭەس مٷشەلەرٸ قوعامنىڭ ٶزەكتٸ مەسەلەلەرٸنٸڭ شەشٸمٸن ەندٸ دەپۋتات رەتٸندە تابۋعا تالپىنارى انىق. جاڭا پارلامەنتتٸڭ تاعى بٸر ەرەكشەلٸگٸ – جاڭادان كەلگەن تۇلعالارمەن قاتار, بٷگٸن ساياساتتا جٷرگەن, تٸسقاققان ساياساتكەرلەردٸڭ دە قالۋى. تٷگەلٸمەن اۋىسىپ كەتسە, كەي جاعدايدا جول سٸلتەيتٸن, تٷزەتەتٸن ادامدار قالماس ەدٸ. ساياساتتا جٷرگەن بٸراز ازاماتتار مەجٸلٸس ساپىندا قالدى», - دەدٸ ول.
ەسكە سالا كەتسەك بٷگٸن «Nur Otan» پارتيياسى ساياسي كەڭەسٸ بيۋروسىنىڭ شەشٸمٸمەن 76 كانديداتتان تۇراتىن تٸزٸم بەكٸتٸلگەن بولاتىن. دەپۋتاتتىققا كانديداتتاردىڭ 7-ۋٸ عانا بۇرىنعى مەملەكەتتٸك قىزمەتكەر, ياعني فراكتسييا قۇرامىندا ولاردىڭ سانى 10%-تەن اسپايدى.
