اقتٶبەدە سۋ تاسقىنىنان زارداپ شەككەن ماحامبەت اۋىلىنىڭ تۇرعىندارىن كٶشٸرۋ ٷشٸن بٸراۋىزدان كەلٸسٸم كەرەك. بۇل تۋرالى وبلىس ەكٸمٸ بەردٸبەك ساپارباەۆ ەسەپ بەرۋ كەزدەسۋٸندە ايتتى, دەپ حابارلايدى قازاقپارات تٸلشٸسٸ.
اقتٶبەدە 2017 جىلى سۋ تاسقىنى بولىپ, جٷزدەگەن ٷيدٸڭ تۇرعىندارى باسپاناسىن تاستاپ, ۋاقىتشا ورىندارعا قونىستانعان بولاتىن. سول كەزدە ماحامبەت اۋىلىنىڭ تۇرعىندارىن تٷگەل كٶشٸرۋ تۋرالى ۇسىنىس قارالىپ, ٷكٸمەت كوميسسيياسى جۇمىس ٸستەدٸ. تۇرعىندار وسى مەسەلەنٸڭ شەشٸمٸن وبلىس ەكٸمٸنەن سۇرادى.
«ماحامبەت, ۆوحر اۋىلىنىڭ جاعدايىن جاقسى بٸلەمٸز. دەمەۋشٸلەردٸڭ كٶمەگٸمەن سۋ تاسقىنىنان سوڭ 120 ٷي سالىندى. ال ماحامبەت اۋىلىن تٷگەل كٶشٸرۋدٸ ويعا العان ەدٸك. ٷكٸمەتتٸڭ ارنايى كوميسسيياسى كەلٸپ قارادى. تەك تۇرعىنداردىڭ بەرٸ بٸرٸگٸپ, قۇجات جيناپ, بٸراۋىزدان كٶشۋگە كەلٸسٸم بەرۋٸ تيٸس بولاتىن. بٸراق كەلٸسٸم بەرٸلمەي, قۇجات دايىندالمادى. مەسەلە سول كٷيٸ اشىق تۇر. بۇل جەردە تۇرۋعا بولمايدى. اۋاسى ناشار, ٷيلەرٸنٸڭ قۇرىلىسى دۇرىس ەمەس. قۇجات رەتتەلسە, باسقا جەرگە كٶشٸرۋ ٸس-شاراسى قولدانىلادى», - دەدٸ اقتٶبە وبلىسىنىڭ ەكٸمٸ بەردٸبەك ساپارباەۆ.
