اقتٶبە وبلىسىنا 1 مىڭ دوزا جەتكٸزٸلٸپ, «قىزىل» ايماقتا جٷرگەن مەديتسينا قىزمەتكەرلەرٸ العاشقى ەكپەنٸ قابىلدادى, دەپ حابارلايدى "ۇلت اقپارات".
«ارنايى جوسپار قۇرىلعان. ۆاكتسيناتسييالاۋ جالعاسادى. كەيٸن مۇعالٸمدەر, مەملەكەتتٸك قىزمەتكەرلەر مەن پوليتسييا قىزمەتكەرلەرٸ ەكپە قابىلدايدى. بارلىعى 25 ارنايى ورىن بەكٸتٸلدٸ. ولار قۇرال-جابدىقپەن قامتاماسىز ەتٸلدٸ. ەكپە بريگاداسى الدىن الا دايىندالىپ, وقىتىلدى. ۆاكتسيناتسييا كەزٸندە 1 مىڭ مەديتسينا قىزمەتكەرٸ ەگٸلدٸ. دەنساۋلىعىنا شاعىم ايتقان ەشكٸم بولمادى», - دەدٸ وبلىستىق سانيتارييالىق-ەپيدەميولوگييالىق باقىلاۋ دەپارتامەنتٸ باسشىنىڭ ورىنباسارى مۇحتار سەرباەۆ.
اقتٶبە وبلىسىنىڭ باس ينفەكتسيونيست دەرٸگەرٸ مەيرامبەك قۇرمانعازين حالىقپەن تىعىز بايلانىستى جۇمىس ٸستەيتٸن قىزمەتكەرلەر بٸرٸنشٸ بولىپ يممۋندالاتىنىن جەتكٸزدٸ.
«كەلەسٸ اپتادا ۆاكتسينانىڭ ەكٸنشٸ بٶلٸگٸ جەتكٸزٸلەدٸ. جەتپەي قالدى, تاۋسىلدى دەپ ايتۋعا بولمايدى. العاشقى لەكتە 1 مىڭ ادام قابىلدانسا, ولار ەكٸنشٸ دوزانى الادى. ەكپە العان ورنى قىزارىپ, قىزۋى كٶتەرٸلگەندەر بولدى. بٸراق بۇل قالىپتى جاعداي. كەيبٸرٸ ٶز دەنساۋلىعىن تەكسەرٸپ, ۆاكتسيناتسييالاۋعا ٷلكەن جاۋاپكەرشٸلٸكپەن قارادى», - دەدٸ مەيرامبەك قۇرمانعازين.
