Aqtóbe oblysyna 1 myń doza jetkizilip, «qyzyl» aimaqta júrgen meditsina qyzmetkerleri alǵashqy ekpeni qabyldady, dep habarlaidy "Ult aqparat".
«Arnaiy jospar qurylǵan. Vaktsinatsiialaý jalǵasady. Keiin muǵalimder, memlekettik qyzmetkerler men politsiia qyzmetkerleri ekpe qabyldaidy. Barlyǵy 25 arnaiy oryn bekitildi. Olar qural-jabdyqpen qamtamasyz etildi. Ekpe brigadasy aldyn ala daiyndalyp, oqytyldy. Vaktsinatsiia kezinde 1 myń meditsina qyzmetkeri egildi. Densaýlyǵyna shaǵym aitqan eshkim bolmady», - dedi oblystyq sanitariialyq-epidemiologiialyq baqylaý departamenti basshynyń orynbasary Muhtar Serbaev.
Aqtóbe oblysynyń bas infektsionist dárigeri Meirambek Qurmanǵazin halyqpen tyǵyz bailanysty jumys isteitin qyzmetkerler birinshi bolyp immýndalatynyn jetkizdi.
«Kelesi aptada vaktsinanyń ekinshi bóligi jetkiziledi. Jetpei qaldy, taýsyldy dep aitýǵa bolmaidy. Alǵashqy lekte 1 myń adam qabyldansa, olar ekinshi dozany alady. Ekpe alǵan orny qyzaryp, qyzýy kóterilgender boldy. Biraq bul qalypty jaǵdai. Keibiri óz densaýlyǵyn tekserip, vaktsinatsiialaýǵa úlken jaýapkershilikpen qarady», - dedi Meirambek Qurmanǵazin.
