اقتٶبە وبلىسى كٶكٷي اۋىلىندا ٸرٸ قارا بەلگٸسٸز ٸندەتتەن قىرىلا باستادى.
قازٸر بۇل اۋىلدان ەت, سٷت ٶنٸمدەرٸن شىعارۋ مەن پايدالانۋعا تىيىم سالىنعان, دەپ حابارلايدى Sputnik قازاقستان اگەنتتٸگٸ كتك تەلەارناسىنا سٸلتەمە جاساپ.
ساراپتاما ٸرٸ قارانىڭ ۆيرۋستى ديارەيادان ٶلگەنٸن راستادى. بٸراق مالدىڭ ٸشٸ نەلٸكتەن ٶتكەنٸن ۆەتەرينارلار ەزٸرگە بٸلمەيدٸ. ايتۋىنشا, مۇنداي جاعداي ٶڭٸردە العاش رەت تٸركەلٸپ وتىر. دەگەنمەن ۆيرۋستىڭ ٶتە قاۋٸپتٸ ەكەنٸن مويىندايدى. سوندىقتان شەكتەۋ شارالارى قولعا الىنعان.
"تەكسەرۋ نەتيجەسٸندە ۆيرۋستى ديارەيا دەگەن دياگنوز قويىلدى. ينفەكتسييالىق اۋرۋ, قىزۋى كٶتەرٸلەدٸ, اسقازانى اۋىرادى, ديارەيا باستالادى. ينفەكتسييالىق اۋرۋدىڭ تارالۋ قاۋپٸ ەردايىم بار. بٸراق بٷگٸندە تىنىش, ەرتەڭ شەكتەۋ شارالارىن قولدانعانننان كەيٸن بۇل اۋرۋ توقتايدى دەپ ويلايمىز", - دەدٸ اقتٶبە وبلىسى اۋىل شارۋاشىلىعى باسقارماسى باسشىسىنىڭ ورىنباسارى يسا بازاروۆ.
اۋىلدان مال اتاۋلى شىعارىلمايدى, سىرتتان كٸرگٸزٸلمەيدٸ. سونىمەن قاتار ەت, سٷت ٶنٸمدەرٸن پايدالانۋعا بولمايدى. بۇل شەكتەۋلەر ەزٸرگە بٸر ايعا سوزىلادى. وسى ۋاقىت ٸشٸندە اۋىلداعى بارلىق ٸرٸ قاراعا ۆاكتسينا سالىنىپ, قورا-قوپسىنى دەزينفەكتسييالاۋ جۇمىستارى جٷرگٸزٸلەدٸ.
