اقش-تىڭ بۇرىنعى مەملەكەتتٸك حاتشىسى, ەسكەري باسشى, شتاب جەتەكشٸلەرٸ بٸرٸككەن كوميتەتٸنٸڭ جەتەكشٸسٸ كولين پاۋەلل 84 جاسىندا قايتىس بولدى. ونىڭ وتباسى Facebook جەلٸسٸندە پاۋەلدٸڭ كوروناۆيرۋستان كٶز جۇمعانىن حابارلادى. وعان كوروناۆيرۋسقا قارسى ۆاكتسينا سالىنسا دا, ۆيرۋس جۇققان, دەپ جازادى ازاتتىق.
ەسكەري سالادا قىزمەت ٸستەگەن گەنەرال كولين پاۋەلل ۆەتنام سوعىسىنا قاتىسقان. رونالد رەيگان تۇسىندا ۇلتتىق قاۋٸپسٸزدٸك جٶنٸندەگٸ پرەزيدەنت كەڭەسشٸسٸ بولدى. ول - قارا نەسٸلدٸلەردەن وسى لاۋازىمعا تاعايىندالعان العاشقى امەريكا ازاماتى. دجورد بۋش پرەزيدەنت بولىپ تۇرعان كەزدە شتاب جەتەكشٸلەرٸ بٸرٸككەن كوميتەتٸن باسقاردى. كٸشٸ دجوردج بۋش تۇسىندا مەملەكەتتٸك حاتشى بولدى.
ول ٸس جٷزٸندە امەريكا ەسكەرٸنٸڭ 1991 جىلى اياقتالعان "شٶلدەگٸ داۋىل" وپەراتسيياسىنا جەتەكشٸلٸك جاساعان. وسى وپەراتسييانىڭ نەتيجەسٸندە ساددام حۋسسەين ەسكەرٸ جەڭٸلٸسكە ۇشىراپ, كۋۆەيت بوستاندىققا قول جەتكٸزدٸ.
2000-جىلدارى مەملەكەتتٸك حاتشى مٸندەتٸن اتقارعان پاۋەلل حالىقارالىق قاۋىمداستىقتى اقش-تىڭ يراكتاعى ەسكەري وپەراتسيياسىن قولداۋعا كٶندٸرۋگە تىرىستى. ول ساددام حۋسسەين رەجيمٸن ادامداردى جاپپاي قىرىپ-جوياتىن قاۋٸپتٸ قارۋ ساقتادى دەپ ايىپتادى.
رەسەيدٸڭ رەسمي تۇلعالارى ونى ەلٸ كٷنگە دەيٸن بۇۇ-دا "يراكتا تابىلعان بيولوگييالىق قارۋدى پروبيركامەن ەكەپ كٶرسەتكەندەي كەيٸپ تانىتتى, شىن مەنٸندە پروبيركا ٸشٸندە قارۋ جوق" دەپ ايىپتايدى. پاۋەلدٸڭ قاۋٸپسٸزدٸك كەڭەسٸنٸڭ وتىرىسىندا پروبيركانى كٶرسەتكەنٸ انىق, بٸراق ول "پروبيركا ٸشٸندە يراكتىڭ بيولوگييالىق قارۋى بار" دەپ تۇجىرىمداعان جوق. ول سونىڭ كٶمەگٸمەن ادامداردى جاپپاي قىرىپ-جويۋ ٷشٸن قارۋدىڭ بٸر عانا پروبيركاسى جەتكٸلٸكتٸ دەپ كٶرسەتكٸسٸ كەلگەن.
مەملەكەتتٸك حاتشى بولىپ تۇرعان تۇستا پاۋەلل اقش-تىڭ ٶز ٸشٸندە جيٸ سىنعا ۇشىرادى. كٸشٸ دجوردج بۋش ەكٸنشٸ مەرزٸمگە سايلانعان كەزدە قىزمەتٸنەن كەتتٸ.
بٸرنەشە سايلاۋدا پاۋەلل پرەزيدەنتتٸككە تٷسەتٸن كانديدات رەتٸندە قاراستىرىلعان, بٸراق سايلاۋعا تٷسۋدەن باس تارتتى. رەسپۋبليكاشىل پاۋەلل ترامپ ساياساتىنان ٶزٸن الشاق ۇستاۋعا تىرىستى.
