بٷگٸن بەلگٸلٸ قالامگەر اياگٷل مانتاي ٶمٸردەن ٶتتٸ. بٸز جازۋشىنىڭ ەلەۋمەتتٸك جەلٸدەگٸ سوڭعى جازباسىن (21 شٸلدە) وقىرمان نازارىنا ۇسىنعاندى جٶن كٶردٸك...
***
جانىڭدى كٸرلەتكٸڭ كەلمەيدٸ... جاندٷنيەڭدٸ بارىنشا تازا ۇستاعىڭ كەلەدٸ... بٸراق بار بولعانى پەندەسٸڭ... جانىڭ تىم نەزٸك بولسا, تٸپتٸ قيىن... سىيلاپ جٷرگەن ادامىڭنىڭ ارامدىعىن سەزسەڭ, كٷيرەپ, سىنىپ كەتەسٸڭ... تٷيسٸگٸڭ مىقتى بولسا, ويىن سەزٸپ قويساڭ, تٸپتٸ قيىن...
جاعىمپاز ادامداردان قاشام... قارايمىن, ولاردىڭ جاندٷنيەسٸندە بٸر تىنىشتىق بار. ولار جاعىمپازدىعىنا تٸپتٸ دە ارلانبايدى. جاعىمپازدىق قاسيەتٸمەن اقشا جاسايدى.
جارىماي جٷرٸپ, پونت جاسايتىن ادامداردان قاشام. جاساندىلىق كٶپ... جاساندىلىعى كٶپ ادامعا پاسىقتىق پەن ارامدىق تەن...
پرينتسيپٸ جوق ادامداردان قاشام... ولار كەز كەلگەن كەزدە ساتىپ كەتەدٸ.
ۋەدە بەرٸپ, ورىندامايتىن ادامداردان قاشام. پرينتسيپٸ جوق ادام عانا ۋەدە بەرٸپ, ورىندامايدى.
مٷگەدەك بولسا دا, قۇدايعا شاعىنبايتىن ادامداردى بٸلەم. جاندٷنيەسٸ تاپ-تازا. بيٸك. پاراساتتى. سولاردىڭ قاسىندا رۋحاني مٷگەدەكتٸگٸڭە ۇيالاسىڭ...
ٶكٸنٸشتٸسٸ, ادامدار ٶزٸنە ۇقساماعان ادامدى ٶلتٸرۋگە, جەرلەۋگە اسىعادى...
مەن ىلعي دا جٷرەككە ورالۋدى, قۇدايعا ورالۋدى ارمانداپپىن. بٸراق ورالماپپىن...
ٶزٸمنٸڭ تاپ-تازا جٷرەگٸمدٸ, قۇدايدى تاپقىم كەلەدٸ.
(بار بولعانى ناماز وقىسام دەپ جٷرگەن قىزدىڭ كٶڭٸل-كٷيٸ. ەسكەرتەم: مورال تىڭداعاندى, وقىعاندى ۇناتپايمىن).
اياگٷل مانتاي
