فيلولوگييا عىلىمدارىنىڭ دوكتورى, م. ەۋەزوۆ اتىنداعى ەدەبيەت جەنە ٶنەر ينستيتۋتىنىڭ ديرەكتورى كەنجەحان ماتىجانوۆ ابايتانۋ عىلىمىنداعى ٶزەكتٸ مەسەلەلەردٸ اتادى, دەپ حابارلايدى قازاقپارات.
«قازاق رۋحانيياتىندا ابايدان كٶپ زەرتتەلگەن, ابايدان كٶپ جازىلعان تۇلعا جوق. اباي تۋرالى جازىلعان ەڭبەكتەردٸ جيناساق, 50 تومنان استام كٸتاپقا جٷك بولادى ەكەن. بٸراق, بٷگٸنگٸ ابايتانۋ دەرەجەسٸ قازٸرگٸ ەلەمدٸك گۋمانيتارلىق عىلىمنىڭ تالاپ-دەگەيٸندە جاۋاپ بەرە الا ما دەسەك, كٶپتەگەن مەسەلەلەر تۋىندايدى. باسقانى ايتپاعاننىڭ ٶزٸندە, ەلٸ كٷنگە دەيٸن ابايدىڭ عۇمىربايانىن تولىق جازىپ بٸتٸرمەدٸك. اباي شىعارمالارىنىڭ اكادەمييالىق جيناعىن تولىق شىعارىپ بٸتكەن جوقپىز. ابايتانۋ مەسەلەلەرٸن تەك ەدەبيەتتانۋ عىلىمى شەڭبەرٸندە عانا اينالىپ جٷرمٸز», - دەدٸ ك. ماتىجانوۆ قر ۇلتتىق اكادەمييالىق كٸتاپحاناسى ۇيىمداستىرعان «اباي جەنە رۋحاني مۇرا» ونلاين كونفەرەنتسيياسىندا.
ونىڭ ايتۋىنشا, كەڭەستٸك دەۋٸردە ابايدى زەرتتەۋ مەن سارالاۋعا ەڭ باستى زارداپ تيگٸزگەن دٷنيە - ابايتانۋدىڭ شەڭبەرٸن تىم تار ايادا قاراستىرۋ.
«اباي قازاق ەدەبيەتٸنٸڭ كلاسسيگٸ, اقىن تٶڭٸرەگٸندە عانا قاراستىرىلىپ كەلدٸ. سٶيتە وتىرا بٸز ابايعا ٷنەمٸ ۇلى, كەمەڭگەر, دانىشپان دەگەن انىقتاۋىشتاردى قوسىپ ايتامىز. وسىنداي انىقتاۋىشتاردى قوسىپ ايتساق, ابايدى ادامزاتتىق تۇرعىدا قالاي سارالايمىز دەگەن مەسەلە تۋىندايدى. سوندىقتان, كەڭەستٸك يدەولوگييا تۇسىندا ابايتانۋدىڭ نەگٸزٸن سالعان مۇحتار ەۋەزوۆتىڭ نەمەسە الاش قايراتكەرلەرٸنٸڭ ەڭبەكتەرٸندە ابايدى ادامزاتتىق عىلىم تۇرعىسىنان سارالاۋ مەسەلەسٸ كٶتەرٸلگەندە ٷنەمٸ تۇساۋ سالىنىپ, قاقپايلانىپ كەلدٸ. سوندىقتان, قازٸرگٸ ابايتانۋ عىلىمىنىڭ الدىنا قويعان ەڭ ٷلكەن مەسەلەنٸڭ بٸرٸ - ابايدى حالىقارالىق تۇلعا رەتٸندە, ادامزاتتىق گۋمانيتارلىق عىلىمعا ٷلكەن ٷلەس قوسقان كەمەڭگەر تۇلعا رەتٸندە تانۋ», - دەدٸ سپيكەر.
سونىمەن بٸرگە, ك. ماتىجانوۆ ابايدىڭ ٶمٸر بويى ادامزاتتىق قۇندىلىقتاردى شىعارماسىنا ٶزەك ەتكەنٸن ايتتى.
«دەمەك بارلىق گۋمانيتارلىق عىلىمىنىڭ - فيلوسوفييا, ەدكبيەتتانۋ, مەدەنيەتتانۋ, ٶنەرتانۋ عىلىمدارىنىڭ ەڭ باستى نىسانى - ادامدىق. وسى تۇرعىدا ابايدىڭ بٷكٸل شىعارمالارىنداعى باستى مەسەلە - ادامدى تانۋ, ادامنىڭ تابيعاتىن تانۋ, ادامنىڭ پسيحولوگيياسىن زەرتتەۋ ەكەندٸگٸن كٶرۋگە بولادى», - دەدٸ كەنجەحان ماتىجانوۆ.
