«پرەزيدەنت ەكٸمشٸلٸگٸ باسشىسىنىڭ بٸرٸنشٸ ورىنباسارى دەۋرەن اباەۆ «اشىق ديالوگ» سۇحباتىنىڭ بۇل جولعى ەفيرٸندە كەسٸپورىن قىزمەتكەرلەرٸن ۆاكتسينا الۋعا مٸندەتتەۋ مەسەلەسٸنە توقتالدى, دەپ حابارلايدى قازاقپارات.
«مەن بۇل ٸستەگٸ مەملەكەتتٸڭ قيسىنىن شامالاپ تٷسٸندٸرٸپ كٶرەيٸن. مەملەكەت ادامدى ەركٸنەن تىس ۆاكتسينا الۋعا كٷشتەي المايدى. بٸراق مەملەكەتتٸڭ بيزنەسكە قىزمەتكەرلەرٸنٸڭ ەكپە الۋى تۋرالى تالاپ قويۋعا قۇقىعى بار. بۇل تالاپ قوعامدىق قاۋٸپسٸزدٸكتٸ ساقتاۋعا باعىتتالعان. مىسالى, بٸزدٸڭ ەربٸر ازاماتتان ٶزٸمەن بٸرگە ٶرت سٶندٸرەتٸن قۇرال الىپ جٷرۋٸن تالاپ ەتۋگە قۇقىمىز جوق. بٸراق ٶرت قاۋٸپسٸزدٸگٸنٸڭ ەرەجەسٸ بويىنشا, ەربٸر كەسٸپورىندا ونداي قۇرال بولۋى مٸندەتتٸ. بۇل – مەملەكەتتٸڭ تالابى. ال كەسٸپورىن ٶز قىزمەتكەرلەرٸ اراسىنداعى انتيۆاكسەرلەردٸڭ پروبلەماسىن قالاي شەشەتٸنٸ - باسقا مەسەلە», - دەدٸ پرەزيدەنت ەكٸمشٸلٸگٸ باسشىسىنىڭ بٸرٸنشٸ ورىنباسارى.
سونداي-اق, دەۋرەن اباەۆ ەگەر جۇمىس بەرۋشٸنٸڭ ٶز قىزمەتكەرلەرٸن پاندەمييا بٸتكەنشە قاشىقتان جۇمىسقا جٸبەرە الاتىن مٷمكٸندٸگٸ بولسا, ٶز ەركٸ ەكەنٸن ەسكەرتتٸ.
«بۇل مەسەلەسٸ بٸر جاعىنان كورپوراتيۆتٸك ەدەپپەن استاسىپ جاتىر. كەسٸپورىندار ٶز قاتارىندا بٷكٸل ۇجىمدى قاۋٸپكە دۋشار ەتەتٸن ادامداردى ۇستاۋعا دايىن با? مىسالى, شىلىم شەگۋ نەمەسە شەكپەۋ - ەركٸمنٸڭ ٶز قۇقىعى. ونى ٶزٸڭٸز شەشەسٸز. مەملەكەت تىيىم سالىپ نەمەسە مٸندەتتەي المايدى. بٸراق سپورت دٷكەندەرٸنٸڭ كٶبٸ مۇنداي زيياندى ەدەتٸ بار ادامداردى جۇمىسقا المايدى. يە, مۇنى شىلىم شەگۋشٸلەردٸ كەمسٸتۋ دەپ قاراۋعا دا بولادى. بٸراق بۇل – جۇمىس بەرۋشٸنٸڭ قۇقىعى», - دەگەن سپيكەر ۆاكتسينالاۋ مەسەلەسٸنە قاتىستى اقش-تا ٶتكەن سوتتى مىسالعا كەلتٸردٸ.
«جۋىقتا تەحاستىڭ فەدەرالدىق سوتى حيۋستونداعى اۋرۋحانالاردىڭ بٸرٸنٸڭ قىزمەتكەرلەرٸ بەرگەن شاعىمدى كەرٸ قايتاردى. ولار دا ۆاكتسينا العىسى كەلمەگەن. سوت قاۋلىسىندا شاعىم بەرۋشٸنٸڭ ۆاكتسينادان باس تارتۋعا قۇقىعى بار ەكەنٸ, بٸراق وندا وعان باسقا جۇمىس ٸزدەۋگە تۋرا كەلەتٸنٸ جازىلعان. سونداعى سۋديانىڭ سٶزٸ ماعان ۇنادى. «ەربٸر جۇمىستىڭ شەكتەۋٸ بولادى, بٸراق سول ٷشٸن سىياقىسى دا بولادى. بۇل – كەلٸسٸمنٸڭ بٸر بٶلٸگٸ». سۋديا وسىلاي دەدٸ. وسى سٶزدٸ وسى جەردە دە قولدانسا, ورىندى بولاتىن شىعار», - دەدٸ دەۋرەن اباەۆ.
