قازاقستان رەسپۋبليكاسىنىڭ ۇلتتىق بانكٸ 2020 جىلدىڭ 3 قازانىندا 2006 جىلعى ٷلگٸدەگٸ 2 000, 5 000 جەنە 10 000 تەڭگەلٸك بانكنوتتاردى ايىرباستاۋ كەزەڭٸنٸڭ اياقتالاتىنىن ەسكە سالادى, دەپ حابارلايدى "ۇلت اقپارات".
قولما-قول اقشا اينالىمىنان الىنعان بانكنوتتاردى قازاقستان رەسپۋبليكاسى ۇلتتىق ۆاليۋتاسىنىڭ قولدانىستاعى اقشا بەلگٸلەرٸنە ايىرباستاۋ تەك قانا ۇلتتىق بانكتٸڭ فيليالدارىندا جٷرگٸزٸلەدٸ.
«2006 جىلعى بانكنوتتاردى كەزەڭ-كەزەڭٸمەن اۋىستىرۋ جەنە الۋ 2016 جىلدىڭ قاراشاسىندا باستالدى. اعىمداعى جىلدىڭ 3 قازانىندا اتالعان بانكنوتتاردىڭ اينالىس مەرزٸمٸ اياقتالعاننان كەيٸن ۇلتتىق بانكتٸڭ فيليالدارى ولاردى قابىلداۋدى جەنە قولدانىستاعى اقشا بەلگٸلەرٸنە ايىرباستاۋدى توقتاتادى. وسى كٷنگە دەيٸن بانكنوتتاردى ەلٸمٸزدٸڭ 17 قالاسىندا ورنالاسقان قر ۇب بارلىق اۋماقتىق فيليالدارىندا ايىرباستاۋعا بولادى», - دەپ اتاپ ٶتتٸ ۇلتتىق بانكتٸڭ قولما-قول اقشا اينالىمى دەپارتامەنتٸنٸڭ ديرەكتورى جومارت قاجىمۇراتوۆ.
