فوتو: Egemen.kz
ٷكٸمەت پرەزيدەنتتٸڭ تاپسىرماسى بويىنشا وتاندىق تاۋار ٶندٸرۋشٸلەردٸ قولداۋدى كەڭەيتٸپ, قازاقستاندىق ٶنٸمگە دەگەن سۇرانىستى ارتتىرۋعا باعىتتالعان جاڭا تەتٸكتەر ەنگٸزۋدە, دەپ حابارلايدى Ult.kz.
سوڭعى جىلدارى مەملەكەتتٸك ورگاندار باسىم تەرتٸپپەن ساتىپ الاتىن تاۋارلار تٸزٸمٸ 2,7 ەسەگە ۇلعايىپ, بٷگٸندە 4,8 مىڭنان استام ٶنٸمدٸ قامتيدى. بۇل — وتاندىق كەسٸپورىندارعا تۇراقتى سۇرانىس قالىپتاستىرىپ, ٶندٸرٸس قۋاتىن ارتتىرۋعا مٷمكٸندٸك بەرەتٸن ماڭىزدى فاكتور.
بيزنەسكە تٷسەتٸن قارجىلىق سالماقتى ازايتۋ ماقساتىندا بٸرقاتار قولداۋ شارالارى ەنگٸزٸلدٸ:
• مەملەكەتتٸك كەلٸسٸمشارتتار بويىنشا ٶندٸرۋشٸلەرگە 30% كٶلەمٸندە الدىن الا تٶلەم بەرٸلەدٸ;
• شارتتى ورىنداۋدى قامتاماسىز ەتۋ تالابى الىنىپ تاستالدى;
• تۇراقسىزدىق ايىبى 10%-دان 3%-عا دەيٸن تٶمەندەتٸلدٸ.
وسىنىڭ نەتيجەسٸندە بيىل جاسالعان مەملەكەتتٸك كەلٸسٸمشارتتاردىڭ جالپى كٶلەمٸ 418 ملرد تەڭگەدەن اسىپ, ٶتكەن جىلمەن سالىستىرعاندا 51,4% ٶسٸم كٶرسەتتٸ.
وتاندىق كەسٸپورىندارعا ٶنٸم ٶتكٸزۋگە كەپٸلدٸك بەرەتٸن وفتەيك-كەلٸسٸمشارتتار دا ايتارلىقتاي نەتيجە بەرٸپ وتىر. 2024 جىلى ولاردىڭ كٶلەمٸ 250 ملرد تەڭگەدەن اسسا, 2025 جىلدىڭ 10 ايىندا بۇل كٶرسەتكٸش 1 ترلن 64 ملرد تەڭگەگە جەتتٸ.
جالپى, بيىل جىل باسىنان بەرٸ 2,3 ترلن تەڭگە سوماسىنا 1,5 مىڭعا جۋىق ۇزاق مەرزٸمدٸ شارتتار مەن وفتەيك-كەلٸسٸمدەر جاسالدى. بۇل — ەلدٸڭ يمپورتقا تەۋەلدٸلٸگٸن ازايتىپ, قازاقستاندىق ٶندٸرۋشٸلەردٸڭ نارىقتاعى پوزيتسيياسىن كٷشەيتۋگە ىقپال ەتەدٸ.
2025 جىلعى 1 شٸلدەدەن باستاپ جەر قويناۋىن پايدالانۋشىلار ستاندارتقا كەلتٸرٸلمەگەن تاۋارلاردى بيرجا ارقىلى ساتىپ الۋ مٸندەتٸنەن بوساتىلادى. بۇل شەشٸم 450 ملرد تەڭگەدەن استام قارجىنى رەتتەلەتٸن ساتىپ الۋلارعا باعىتتاپ, وتاندىق كومپانييالار ٷشٸن قولجەتٸمدٸلٸكتٸ ارتتىرۋعا مٷمكٸندٸك بەردٸ. توعىز ايدىڭ قورىتىندىسى بويىنشا مۇنداي ساتىپ الۋلارداعى جەرگٸلٸكتٸ قامتۋ ٷلەسٸ 54,4% بولدى.
سونىمەن قاتار وتاندىق ٶندٸرۋشٸلەرمەن ۇزاق مەرزٸمدٸ كەلٸسٸمشارتتار جاساسۋ مٸندەتتەمەلەرٸن بەكٸتەتٸن زاڭ دا كٷشٸنە ەندٸ. ال جاڭا جىلدان باستاپ قازاقستاندىق تاۋار ٶندٸرۋشٸلەردٸڭ بٸرىڭعاي تٸزٸلٸمٸ ٸسكە قوسىلادى — ول ٶنٸمنٸڭ شىعۋ تەگٸن اشىق راستاۋدى قامتاماسىز ەتەدٸ.
ٷكٸمەت قابىلداپ جاتقان شارالار قازاقستاندىق قامتۋ ٷلەسٸن تۇراقتى ارتتىرىپ, وتاندىق ٶندٸرٸس ٷشٸن بولجامدى ەرٸ ۇزاق مەرزٸمدٸ ٶتكٸزۋ نارىعىن قالىپتاستىرۋعا باعىتتالعان.
