«قازاقتانۋ» زەرتتەۋ ينستيتۋتىنىڭ ديرەكتورى باقتىباي جۇمادٸلدين بولشەۆيكتەر بيلٸككە كەلگەنگە دەيٸن قازاق دالاسىندا 100 ملن باس مال بولعانىن ايتتى, دەپ حابارلايدى قازاقپارات تٸلشٸسٸ.
ۇلتتىق مۋزەيدە ٶتكەن «ۇلى دالانىڭ ۇلى تۇلعالارى» اتتى تاريحي-تانىمدىق دٶڭگەلەك ٷستەل بارىسىندا تاريحشىلار ساياسي سٷرگٸننٸڭ قازاقتى اتتان تٷسٸرٸپ, مالىن قۇرتۋدان باستالعانىن ايتتى.
«كەيبٸر دەرەكتەردە حح عاسىردىڭ باسىندا قازاق دالاسىندا 100 ملن باس مال بولعانىن ايتادى. وسىنىڭ سوڭىنا تٷسٸپ, زەرتتەپ جاتقان ەشكٸم جوق. ال 1917 جىلعى ساناقتا قازاقتاردىڭ قولىندا 72 ملن باس مال بولعان. 1928 جىلى ول 40 ملن باسقا تٷستٸ. ودان كەيٸنگٸ 3 جىلدا ەلگٸ 40 ملن مالدان 4,5 ملن باس قالدى», دەيدٸ تاريحشى جۋرناليست.
قازاقتانۋشى عالىم وقۋشىلارعا «باي» دەگەن ۇعىمنىڭ مەنٸ مٷلدە بۇرمالانىپ كەتكەنٸن دە ايتتى.
«باي» دەگەن سٶزدٸڭ تٷپكٸ ماعىناسى «ەر», «قولىنان ٸس كەلەتٸن ازامات» دەگەندٸ بٸلدٸرەدٸ. تٷرٸكتەردٸڭ مىرزانى «بەي» دەيتٸنٸ سوعان دەلەل. وسىنداي اياۋلى ۇعىمدى بولشەۆيكتەر سانامىزعا تاپ رەتٸندە تاڭىپ, «قاناۋشى» دەگەن مەن ٷستەپ جٸبەردٸ. سول بايلاردى قۋدالاپ, قۇرتۋ ارقىلى قازاقتى باسسىز قالدىردى», - دەدٸ تاريحشى.
