Shyǵys Qazaqstannyń Zyrian aýdany men qalasyn Altai dep ataý usynysyn aýdandyq máslihat depýtattary men jergilikti qoǵamdyq uiym músheleri biraýyzdan qoldady, dep habarlaidy QazAqparat tilshisi.
Qalalyq mádeniet úiinde áýeli Zyrian aýdanyn Altai dep ataý máselesi qaraldy. Aýdandyq máslihat depýtattary jańa ataýdy bir aýyzdan qoldap, daýys berdi. Al shahar atyn qaita ataý máselesin jergilikti qoǵamdyq keńes músheleri talqylady. Bas aiaǵy bir saǵatqa sozylǵan jiynda qoǵamdyq keńes ókilderi bir toqtamǵa kelip, shahar atyn "Altai" dep aýystyrý qajet dep sheshti.
Turaqty keńes músheleri de bul usynysty biraýyzdan qoldady.
Bul oń sheshimge aýdannyń ziialy qaýym ókilderi riza kóńilmen tarqasty.
«Qalamyzǵa da, aýdanǵa da tyń serpin kerek. Sol serpinniń rýhani jańǵyrýdan bastalǵany qýantady. «Altai» deitin álemdik brendti ekonomikamyzdyń damýyna paidalanbaý kúná der edim. Osy qalanyń órkendeýine úles qosyp, óndiris qazanynda quryshtai qainaǵan aǵa býyn bul ózgeristi quptaitynyn málimdegim keledi» - deidi Zyrian aýdandyq qoǵamdyq jáne ardagerler keńesiniń tóraiymy Ella Geiger.
«Altai - qazaq dalasyna taǵdyr aidap ákelgen san túrli ult pen ulysty qushaǵyna syidyrǵan kieli ólke. XVIII ǵasyrda kelgen eski nanym ókilderi de, ekinshi dúniejúzilik soǵys kezinde jer aýdarylǵan almandar men ózge ulttar da Altaidyń qoiynynan pana tapty. Sondyqtan aýdanymyzdyń osy uly ataýdy alýy zańdylyq. Bul ólkeniń Altai atanýy tarihymyzdy qaita qaraýǵa bastama degen úmit bar. Tarihshy retinde munda da túrki órkenietinen qalǵan muralar kóp ekenin aita alam. Sonyń bári jaryqqa shyqsa, biz óz bastaýymyzǵa oralǵan bolar edik» - deidi ólketanýshy Denis Nikitin.
