Tokio Olimpiadasynyń qola júldegeri Zýlfiia Chinshanlo Qyzylorda qalasynda erler men áielder arasynda ótip jatqan el chempionatynda tórt rekordty jańartty, dep habarlaidy QazAqparat.
Qazaqstan aýyr atletika federatsiiasy málim etkenindei, Zýlfiia 59 kelige deiingi salmaqta úzdik shyqty. Ol qossaiys qorytyndysynda 223 kelini (95+128) kóterdi.
Ekinshi orynǵa ie bolǵan qarsylasyn 51 kelige artqa qaldyrǵan Chinshanlo Qazaqstannyń tórt rekordyna (julqa kóterýden eki, serpe kóterýden bir jáne qossaiys qorytyndysynda) qol jetkizdi.
Sonymen qatar qazaqstandyq aýyr atletke Ashhabad qalasynda 2018 jyly ótken álem chempionatynyń qola júldesi de tabys etildi. Bul birinshilikte Zýlfiia besinshi orynǵa taban tiregen edi. Áitse de onyń aldyndaǵy eki sportshynyń nátijeleri joqqa shyǵarylǵandyqtan, Chinshanlo úzdik úshtikke ilikken edi.
Zýlfiia el birinshiligine tyńǵylyqty daiyndalǵanyn, sondai-aq álem chempionatynyń júldesin alǵanyna qýanyshty ekendigin, budan bylai da tynbai eńbektene beretinin jetkizdi.
Chinshanlony osynaý tabysymen Ilia Ilin Instagramdaǵy paraqshasynda quttyqtady.
«Búgin Zýlfiia Chinshanlo serpe kóterýden 128 kg olimpiada rekordyna qol jetkizdi. Jalpy nátije – 223 kg jáne álemdik reitingte 1-orynǵa kóteriledi. Saǵan ózińniń besinshi olimpiadańa baryp, altyn alýyńa tilektespin», dep jazdy Ilin.
Qazaqstan chempionatyndaǵy alǵashqy eki kúnniń nátijeleri mynadai:
Áielder. 45 keli
1. Aleksandra Belenko (59+76) – ShQO
2. Ainur Ábdihalyqova (59+72) – Jambyl oblysy
3. Alfiia Garifýllina (57+73) – Almaty oblysy
49 keli
1. Daria Balabaniýk (70+83) – Qaraǵandy oblysy
2. Aiym Muhametjanova (60+75) – Aqmola oblysy
3. Saltanat Qypshaqbai (48+59) – Qyzylorda oblysy
55 keli
1. Aigerim Aýylbek (76+94) Almaty obl.
2. Shynar Japar (73+86) Jambyl obl.
3. Bibisara Janbolat (64+80) Almaty obl.
59 keli
1. Zýlfiia Chinshanlo (95+128) Almaty obl.
2. Altynai Tánirbergenova (74+98) Qyzylorda obl.
3. Alina Koliýshko (77+94) SQO
Erler. 55 keli
1. Arli Chontei (109+127) – Shymkent
2. Anatolii Grýbov (110+125) – Almaty oblysy
3. Ernaz Alpysov (102+123) – ShQO
61 keli
1. Ótepbergen Áliev (121+145) BQO
2. Azamat Tólegen (113+138) Qyzylorda obl.
3. Jalǵas Seitov (113+133) Aqmola obl.
Qazaqstan chempionaty 23 sáýirge deiin jalǵasady.
