Zorlaý qylmysyna qatysty zańnamany qataitý máselesi boiynsha ótip jatqan dóńgelek ústelge «Talgo» poiyzynda zorlyq kórgen jábirlenýshi de qatysty, dep habarlaidy QazAqparat tilshisi.
«Talgo» poiyzynda zorlyq kórgen jábirlenýshi basynan ótken oqiǵany dóńgelek ústelge qatysýshylarǵa tolyq baiandai kelip, áýelde kináli tarap isti aqsha tóleý arqyly jaýyp tastamaq bolǵanyn aitty.
«Istiń basqalai baǵyt alyp bara jatqanyn kórgende maǵan zorlyq kórsetken tarap aqsha usyndy. Men aqshaǵa muqtaj adam emes ekenimdi, ar-namysym úshin kúresip júrgenimdi aittym. Olar usynǵan aqshany men eki aida taba alamyn. Eki aida tabatyn aqshany biz saǵan bir jolda bergeli otyrmyz dep kóndirmek boldy», - deidi jábirlenýshi.
Ol sondai-aq bul isti eshqandai yń-shyńsyz, zań aiasyda sheshpek bolǵanyn aitady. Alaida óz quqyǵy men namysy qorǵalyp jatpaǵanyn kórgende ǵana qoǵamdyq uiymdarǵa júgingen.
«Men eń birinshi egde jastaǵy ata-anamdy oiladym. Solarǵa aýyr tietinin bildim. Sol úshin eshqandai rezonans týǵyzbai-aq, zań aiasynda sheshkim keldi. Biraq olai múmkin bolmady», - degen zardap shegýshi «Qazaqstan temir joly» kompaniiasynyń ókilderinen jolaýshylardyń qaýipsizdigin qamtamasyz etýdi surady.
«Qazaqstan temir joly» kompaniiasynan jolaýshylardyń qaýipsizdigin tolyq kólemde qamtamasyz etýdi suraimyn. Vagondarǵa belgi beretin tetik ornata ma, álde beinebaqylaý qoia ma, áiteýir qaýipsizdikti qamtamasyz etý qajet. Eger sol kezde osyndai tetikter bolsa, men osylaisha azap shekpes edim», - dedi ol.
