Respýblikalyq arnalardyń birinde daý týdy. Maqsaty eki tarapty tataýlastyrý bolyp sanalatyn tok-shoý barysynda zorlyq-zombylyq qurbanyn kináli dep aiyptai bastaǵan, dep jazady sputniknews.kz.
31 arnadan birneshe aidan beri kórsetilip kele jatqan "Kel, tatýlasaiyq!" baǵdarlamasyna 18 jastaǵy Qyzǵaldaq Talǵat esimdi boijetken keldi. Ony 14 jasynda úsh jigit zorlaǵan. Olardy sottaǵan, alaida túrmege qamamaǵan. Al jábirlenýshi boijetken sol oqiǵadan keiin júkti bolyp, ul týdy. Qyzǵaldaq baǵdarlamaǵa balanyń boljaldy ákesimen kezdesip turǵanyn qalaitynyn jáne odan aliment alǵysy keletinin aitty.
"Balamnyń óz ákesimen kórisip turǵanyn qalaimyn jáne aliment alǵym keledi. Sebebi, alimenttiń ózi ekeýiniń kezdesýine bir sebep bolady dep oilaimyn... Balany aiyna bir ret bolsyn ákesine kórsetkim keledi", – dedi boijetken.
Qyzǵaldaq toǵyz jasynda anasynan aiyrylǵan, ákesi jáne aǵasy bar.
Baǵdarlama júrgizýshisi efir barysynda Raiymbek aýdanynyń prokratýrasyna, sotyna qajetti is qaǵazdardy jiberip, osy máseleni qaita kóterip otyrǵanyn aitty. Olar tipti, balanyń Didar esimdi boljaldy ákesin izdep aýylǵa barǵan. Alaida, onymen tanysý, sóilesý múmkin bolmady.
Baǵdarlamalardyń birinde ákesi efir kezinde qońyraý shalyp, qyzynyń zorlanǵanyna boijetkenniń ózi kináli ekenin aitqan. Sebebi, ol aýyl ishinde kóp júre bergen, al zorlaýshylardyń sany úsh adamnan áldeqaida kóp bolǵanyn kórinedi.
Sondai-aq, kelesi bir shyǵarylymda efirge Qyzǵaldaqtyń týysqan ápkesi habarlasty. Ol jábirlenýshiniń ákesi zorlaýshylardy keshirip nemese olarmen kelise otyryp, sol kezdegi kámeletke tolmaǵan qyzynyń taǵdyryn sheshkenin aitty. Onyń aitýynsha, týystarynyń barlyǵy qyzdyń ákesimen sol oqiǵadan keiin aralaspaidy.
Telearna túsiniktemesi
31 arna ókilderi osy jaǵdaiǵa bailanysty óziniń pikirin bildirdi. Olar da bul jobanyń maqsaty – qyzdy zorlaǵandardy jaýapqa tartýǵa jáne balanyń biologiialyq ákesinen aliment tóleýge qol jetkizý ekenin aitty.
"Joba barysynda bir kezderi zorlaýshylarmen mámilege kelgen jáne olardy keshirgen qyzdyń ákesin Qyzǵaldaqpen tatýlastyrdyq. Al endi redaktsiia kúdiktilerdi jazalaý jáne aliment óndirip, ádilettik ornatýǵa bar kúshin salyp jatyr. "Kel, tatýlasaiyq" baǵdarlamasynyń aralasýynan keiin Almaty oblystyq prokýratýrasy 3 jyl buryn jabylǵan qylmystyq isti qaita qozǵady", – dedi arnanyń baspasóz qyzmeti.
Sonymen qatar, aliment taǵaiyndaý týraly is Almaty qalasynyń kámeletke tolmaǵandar isi jónindegi mamandandyrylǵan aýdanaralyq sotta qaralyp jatyr.
Arnanyń habarlaýynsha, Qyzǵaldaq Talǵat osy isti qolǵa alý úshin arnaǵa kelip kómek suraǵan.
"31 arna men baǵdarlamanyń túsirilim toby Qyzǵaldaqtyń kinálilerdi jazalaý týraly oiyn qoldady. Biz oǵan zańger jaldadyq. Telearna men bilikti zańgerlerdiń kómegi jáne osy baǵdarlama tarapynan nazar aýdarylýy nátijesinde, Qyzǵaldaqty zorlaý isi boiynsha tergeý 3 jyldan keiin qaita bastaldy. Qazir sotta ákesi retinde taný jáne aliment tóleý týraly is jatyr", – delingen habarlamada.
Sulpak isti sot arqyly sheshetinin málimdedi
Telearna men baǵdarlama ókilderi zorlyq-zombylyqty aqtaý múmkin emes degen pikirdi ustanady. Zorlaýshylar jazaǵa tartylatynyn bilýi tiis dep sanaidy. Jábirlenýshi qashan da jábirlenýshi bolyp qalady, qandai jaǵdai bolsa da, onyń kinási joq.
Qyzǵaldaqtyń jaǵdaiynda biz tek bir ǵana maqsatty kózdeimiz – kinálilerdi jazalaý, oǵan ádilettilikke qol jetkizýine kómektesý, dep tolyqtyrdy arnanyń baspasóz qyzmeti.
Bir qyzyǵy, osy oqiǵadan keiin zorlaýshymen tatýlasý týraly baǵdarlama jasaǵan tok-shoýdy jabý týraly petitsiia bastaldy.
Sonymen qatar tok-shoý tóńireginde bolǵan janjalǵa bailanysty aty atalǵan Sulpak saýda jelisi telearnamen eki jyldan beri birlesip jumys istemeitinin habarlady. Kompaniia ókilderi Sulpak saýda jelisin demeýshi retinde kórsetkeni jala ekenin, sol sebepti sot arqyly sheshiletinin málimdedi.
