AQSh-tyń Virdjiniia shtatyndaǵy I-95 tasjolynda bolǵan jantúrshigerlik jol apaty saldarynan bes adam qaza taýyp, ondaǵan adam jaraqat aldy. Qaiǵyly oqiǵa jolaýshylar avtobýsynyń jol jóndeý jumystary júrgizilip jatqan aýmaqtaǵy kepteliske soǵylýynan bastalǵan, dep habarlaidy ult.kz.
Tergeý málimetinshe, avtobýs júrgizýshisi alda turǵan kólikter legin der kezinde baiqamai, birneshe jeńil kólik pen jol talǵamaityn kólikke soǵylǵan. Qatty soqqydan keiin kólikterdiń biri órtenip ketken. Oqiǵa ornynda dúrbeleń týyndap, keibir jolaýshylar synǵan terezeler arqyly syrtqa shyǵýǵa májbúr bolǵan.
Apat saldarynan kóz jumǵandardyń arasynda toiǵa bara jatqan tórt adamnan turatyn bir otbasy bar. Olar merekelik sharaǵa qatysý úshin jolǵa shyqqan. Otbasynyń birneshe múshesi oqiǵa ornynda qaza tapsa, taǵy bir týysy aýyr jaraqatpen aýrýhanaǵa jetkizilgen.
Jol apatynan keiin oqiǵa ornyna ondaǵan qutqarýshy, órt sóndirýshi jáne jedel járdem brigadalary jumyldyryldy. Barlyǵy 40-tan astam adam túrli jaraqat alyp, jaqyn mańdaǵy meditsinalyq mekemelerge jetkizildi. Keibir zardap shekkenderdiń jaǵdaiy aýyr dep baǵalanýda.
Qazir avtobýs júrgizýshisine abaisyzda adam ólimine ákep soqqan áreket boiynsha aiyp taǵylyp, oqiǵanyń barlyq mán-jaiy anyqtalýda. Tergeýshiler júrgizýshiniń jyldamdyq rejimin saqtaǵan-saqtamaǵanyn jáne onyń sharshaý faktoryn da tekserip jatyr.
Bul apat AQSh-ta biylǵy jyly tirkelgen eń iri jol-kólik oqiǵalarynyń biri retinde baǵalanyp otyr.
