"Egemen Qazaqstan" gazeti redaktsiiasynda Aqparat jáne qoǵamdyq damý ministri Aida Balaevanyń qatysýymen ziialy qaýym ókilderi Memleket basshysy Qasym-Jomart Toqaevtyń "Jańa jaǵdaidaǵy Qazaqstan: is-qimyl kezeńi" atty Joldaýyn talqylady, - dep habarlaidy Egemen.kz.
Dóńgelek ústelge QR Májilis depýtattary, elimizdegi bedeldi JOO basshylary, oblystyq gazetterdiń bas redaktorlary, aqyn-jazýshylar men baspasóz ókilderi qatysty.
Jiyn barysynda sóz alǵan Májilis depýtaty Darhan Qamzabekuly ár Joldaý reformalardy júzege asyrý úshin jasalatynyn atap ótti.
"Prezidenttiń kezekti Joldaýynda sabaqtastyq bar. Óitkeni Memleket basshysy Qasym-Jomart Toqaev osydan 5 jyl buryn Elbasy kótergen máselelerdiń kópshiligin ári qarai júzege asyrýdyń joldaryn usyndy. Prezident Joldaýda "kesh qabyldanǵan sheshimniń ózi jai ǵana ziian emes, ol ulttyq qaýipsizdigimizge qater tóndiredi" dedi. Bizdiń búgingi jiyn da óte der kezinde jasalyp otyr. Ár depýtattyń tiimdiligi bolýy kerek. Sonda ǵana jaqsy sapaly zańdar bolady. Bizdiń atqarýshy bilik te zańǵa jai qarai salmai, búkil bolashaq strategiialyq maqsatyn oryndaýyn kózdeýge barynsha atsalyssyn dep aityp otyr. Menińshe ol óte durys másele", - dedi ol.
Sondai-aq L. N. Gýmilev atyndaǵy Eýraziia ulttyq ýniversitetiniń rektory Erlan Sydyqov Joldaý halyqtyń múddesine baǵyttalǵanyn sóz etti.
"Osydan 1 jyl buryn sailaýaldy naýqanǵa Prezident halyqtyń únine qulaq asatyn memleket qajet dep aitqan bolatyn. Sol sóz biliktiń ustanymyna ainalyp kele jatqanyn kórip otyrmyz. Sondyqtan da bolar osy aralyqta kóptegen máseleler kóterildi. Barynsha operativti túrde kóp másele sheshilip jatyr. Bilik pen halyq arasynda únemi bailanys bolýy kerek. Bizde halyqtyń oiyn estip otyratyndai mehanizm bolýy kerek. Ony jasaityn partiialar, qoǵamdyq uiymdar, qoǵamdyq birlestikter, májilis, máslihattar. Osy uiymdarǵa basa nazar aýdaryldy. Qujatta olarǵa qosymsha quqyq beriletini aityldy. Máslihattar bilikke petitsiiamen shyǵýǵa deiin barý kerek ekenin aityp otyr. Bul revoliýtsiialyq sheshim. Osy sheshim kóńilimizge jaqsy uia salyp otyr. Bul qoǵamdyq uiymdar júieli túrde eki arada bailanys jasap otyrǵanymen, bilik pen halyqtyń saiasi mádenietiniń deńgeii bir birine jaqyn bolý kerek",- dedi Erlan Sydyqov.
Aita keteiik, jiynnan soń Aida Balaeva "Egemen Qazaqstan" gazetiniń tilshilerimen kezdesti. Basylymnyń atqaryp jatqan jumysyna oń baǵa bergen ministr ujymǵa ministrliktiń atynan avtokólik syiǵa tartty.
