Zimbabveniń burynǵy prezidenti, Afrikany azat etý qozǵalysy jetekshileriniń biri, diktator Robert Mýgabe 96 jasynda qaitys boldy, - dep habarlady britandyq BBC telearnasy. Onyń qaitys bolǵanyn týystary rastady.
Mýgabe Singapýrda otbasynyń ortasynda, sonyń ishinde jubaiy Greistiń qasynda aýrýhanada kóz jumdy.
«Ókinishke orai, biz odan aiyrylyp qaldyq. Biz bul kún eshqashan kelmeitin bolar dep úmittendik. Ol jaqsy ómir súrdi», - dedi Mýgabe biligi kezindegi burynǵy ministri. Ol aty-jónin jariialamaýdy jón kórdi.
Mýgabe Ońtústik Rodeziianyń (Zimbabveniń burynǵy aty) Ulybritaniiadan táýelsizdik alýyna kúsh salǵan uiymǵa jetekshilik etti. 1965 jyly memleket táýelsizdigin jariialady. Biraq onyń táýelsizdigin halyqaralyq qaýymdastyq moiyndamady.
1980 jyly elde azamattyq soǵys aiaqtalyp, Mýgabe sailaýda jeńiske jetti. Táýelsiz Zimbabveniń premer-ministri bolyp taǵaiyndaldy.
Zimbabveni táýelsizdik alǵan 1980 jyldan beri basqarǵan Robert Mýgabe 2017 jyly áskeri tóńkeristen soń bilikten ketken.
Synshylar Mýgabe rejimin demokratiialyq protsesterdi tejedi, aq násil ókilderin qýǵyndady, eldi ekonomikalyq tyǵyryqtan shyǵara almady dep synady. Eldi basqaryp turǵan tusta infliatsiia deńgeii eki million protsentke jetti, turǵyndarynyń 90 paiyzy jumyssyz boldy.
Mýgabeniń ózi máseleniń túp-tamyryn "álemdik otarlaýshylar" men ishki jáne syrtqy kúshterden kórdi. 2015-2016 jyldar aralyǵynda ol Afrika odaǵyn basqardy.
