Almaty oblysynda jylqyny kólikpen ádeii basqan júrgizýshige qatysty ákimdik túsinikteme berdi, dep habarlaidy QazAqparat.
«Ile aýdanynda jol talǵamaityn kólikpen jylqyny ádeii basqan oqiǵa shildeniń 16-da bolǵan. Qazir júrgizýshige qatysty QR Qylmystyq kodeksiniń 316-baby «Janýarlarǵa qatygezdik jasaý» deregi boiynsha is qozǵaldy. Oblystyq politsiia departamentiniń baspasóz qyzmeti oqiǵa basshylyqtyń nazaryna alynǵanyn jetkizdi», - dep jazdy óziniń Facebook-tegi paraqshasynda Almaty oblysy ákiminiń baspasóz qyzmetiniń jetekshisi Ǵalymurat Júkel.
Aita keteiik, er adamnyń jol talǵamaityn kólikpen jylqyny qasaqana túrde basyp jatqan videosy jelige taraaǵan bolatyn. Video avtory jylqyny basqan adamdy politsiia alyp ketip, artynsha bostandyqqa jibere salǵandyǵyna shaǵymdanady.
«Myna jigit keshe bizdiń jylqymyzdy kólikpen basqan. Keshe túnde politsiia alyp ketken. Al búgin bostandyqta júr. Bul ne masqara!» - deidi videoǵa túsirip turǵan avtor.
Al politsiia kúdiktiniń arnaiy qolhatpen bosatylǵanyn habarlady.
«16 shilde kúni Ile aýdanyndaǵy Mejdýrechinsk aýylynyń 38 jastaǵy turǵyny kórshisimen janjaldasyp, onyń jylqysyn qasaqana túrde jol talǵamaityn kólikpen basqan. Qazir kúdiktiniń ústinen QR QK 316 baby (Janýarlarǵa qatygezdik jasaý) boiynsha is qozǵaldy. Arnaiy qolhatpen bosatyldy», - delingen Almaty oblystyq politsiia departamenti baspasóz qyzmetiniń habarlamasynda.
