QR Memlekettik qyzmet isteri jáne sybailas jemqorlyqqa qarsy is-qimyl agenttigi sybailas jemqorlyq boiynsha maqala jazatyn jýrnalisterdi oqytpaq. Bul jaiynda búgin QR Ortalyq kommýnikatsiialar qyzmetindegi baspasóz máslihatynda «Atameken» ulttyq kásipkerler palatasynyń ókili Murat Ábenov aitty, dep habarlaidy "Ult aqparat" QazAqparatqa silteme jasap.
«Sońǵy kezderi jemqorlyq faktileri oryn alǵan jaǵdaida vatsap arqyly video taraityn bolyp júr. Oǵan sene berýge bolmaidy. Óitkeni, sodan keiin jýrnalister jaýapkershilikke tartylyp jatady. Osyǵan orai biz agenttikke (QR Memlekettik qyzmet isteri jáne sybailas jemqorlyqqa qarsy is-qimyl agenttigi) sybailas jemqorlyq boiynsha maqala jazatyn jýrnalisterge jumys isteý tásilderin kórsetip, tehnologiialardy úiretý jónindegi usynys jasadyq. Agenttik qabyldady», - dedi Murat Ábenov.
Sonymen qatar ol barlyq memlekettik organdardyń baspasóz hatshylaryn kez kelgen jaǵdaida qalai jedel jumys isteý qajettigin, jedel aqparatty qalai berý kerektigin úiretý qajettigin aitty.
«Jalpy, jemqorlar óte saýatty. Jyldan jylǵa jemqorlardyń saýattylyǵy joǵarylap keledi. Internet arqyly bir-birne para beredi, shetelden esepshot ashady. Kózge kórinbeitindei áreketter jasaidy. Olardy ashý úshin jýrnalis te, qoǵam da saýatty bolýy tiis», - dedi ol.
Al «Azamattyq alians» azamattyq quqyq odaǵynyń prezidenti Dýambek Musaǵali jemqorlyq faktilerine qatysty málimetterdi jariialaityn arnaiy baspasóz klýbynyń bolǵandyǵyn, biraq, jýrnalisterdiń belsendilik tanytpaýy saldarynan jabylǵanyn atap ótti.
«Biz talai ret baspasóz máslihatyn uiymdastyrǵan kezde jýrnalister kelýin qoidy. Olar aldyn ala qandai taqyryp ekendigin surap alyp, qyzyqty bolmasa kelmei qoiady. Sodan keiin atalǵan klýbymyzdy japtyq. Jýrnalister belsendiliginiń báseńdeýi saldarynan áleýmettik jeli qatty damyp ketti», - dedi Dýambek Musaǵali.
