Ulttyq bank 2022 jyldyń sońynda infliatsiianyń 13-15% deńgeiinde bolatynyn boljady. Bul týraly qarjy retteýshi uiymnyń tóraǵasy Ǵalymjan Pirmatov aitty, dep habarlaidy QazAqparat.
Aita keteiik, Senatta «2021 jylǵy respýblikalyq biýdjetti oryndaý týraly» QR Úkimetiniń jáne respýblikalyq biýdjettiń atqarylýyn baqylaý jónindegi esep komitetiniń baiandamalary tyńdalyp jatyr.
«Biylǵy infliatsiialyq qysym geosaiasi daǵdarys bastalýynan kúsheidi, odan keiin aqpan-naýryzda teńgeniń aiyrbastaý baǵamynyń álsireýi jáne joǵary belgisizdiktiń saldarynan shamadan tys ósken tutynýshylyq belsendilik baiqaldy. Onyń saldarynan infliatsiia aqpandaǵy 8,7%-dan mamyrda 14%-ǵa deiin ósti. Jyldyq mánde 19%-ǵa jetken azyq-túlik ónimderi baǵasynyń ósýi de birshama úles qosyp keledi», - dedi Ulttyq bank tóraǵasy Senattyń jalpy otyrysynda.
Onyń aitýynsha, syrtqy infliatsiialyq jaǵdai azyq-túlikke jatpaityn taýarlar baǵasynyń artýyna qysym kórsetýde, olardyń ósýi 11,9%-ǵa deiin jedeldedi.
Retteletin qyzmet baǵasyn ósirýge engizilgen moratoriidiń tejeýish áserine qaramastan, aqyly qyzmet infliatsiiasy 9,1%-ǵa deiin ósti.
«Syrtqy sektorda geosaiasi ahýaldyń edáýir nasharlaýynan syrtqy shoktyń el ekonomikasyna saldaryn barynsha azaitý, baǵa turaqtylyǵyn saqtaý jáne jergilikti valiýtadaǵy aktivterdi qorǵaý maqsatynda Ulttyq bank 2022 jylǵy 24 aqpanda bazalyq mólsherlemeni 13,5%-ǵa deiin kóterdi. Úkimetpen birlesip, jeke tulǵalardyń teńgedegi depozitteri boiynsha ótemaqyny biýdjet qarajaty esebinen tóleýdi kózdeitin Teńgelik salymdardy qorǵaý baǵdarlamasy jariialandy. Údemeli syrtqy infliatsiialyq qysym, jalǵasyp kele jatqan yntalandyrýshy fiskaldyq saiasat, turaqty ishki jáne syrtqy suranys, infliatsiialyq boljamdardyń ósýinen 25 sáýirde bazalyq mólsherleme 14%-ǵa deiin kóterildi», - dedi Ǵ. Pirmatov.
Sonymen qatar Ulttyq bank aiyrbas baǵamynyń kúrt aýytqýyn jáne onyń infliatsiiaǵa aýysýyn shekteý sharalaryn qabyldaǵan.
Nátijesinde aiyrbas baǵamy kúrt aýytqýdan keiin ótken jyldyń sońyndaǵy deńgeige qaita oraldy.
«Osy áreketterdiń nátijesinde dollarlanýdyń ósý táýekelderi azaiyp, qarjy júiesi syrtqy shoktarǵa tótep bere aldy. Infliatsiiaǵa qarsy saiasatty kúsheitý úshin Úkimet jergilikti atqarýshy organdarmen birlesip, 2022-2024 jyldarǵa arnalǵan jańartylǵan Infliatsiia deńgeiin baqylaý jáne tómendetý jónindegi sharalar keshenin júrgizip jatyr. Qysqa merzimdi jáne orta merzimdi perspektivadaǵy infliatsiia syn-qaterleriniń qazirgi balansy men jańartylǵan boljamdardy eskere otyryp, Ulttyq bank biylǵy 6 maýsymda bazalyq mólsherlemeni 14% deńgeiinde saqtaý týraly sheshim qabyldady. Ulttyq bank 2022 jyldyń sońynda infliatsiianyń 13-15% deńgeiinde bolatynyn boljap otyr. Boljam Úkimettiń infliatsiia deńgeiin baqylaý jáne tómendetý jónindegi sharalar keshenin iske asyrýyn eskere otyryp jasaldy», - dedi Ǵalymjan Pirmatov.
