QR Densaýlyq saqtaý ministrligi Densaýlyq saqtaýdy damytý respýblikalyq ortalyǵy 2020-2025 jyldarǵa arnalǵan jańa memlekettik baǵdarlama týraly baiandady, dep habarlaidy QazAqparat tilshisi.
Jańa baǵdarlamany QR DSM Densaýlyq saqtaýdy damytý respýblikalyq ortalyǵy ázirlep jatyr.
«Munda «Densaýlyq týraly kodeksti» qaita jazyp shyqtyq deýge bolady. Jáne onda kelesi jazdan bastap kúshine enetin jańa tórt ekpin kórsetilgen. Máselen, qoǵamdyq densaýlyqty qadaǵalaý qyzmeti, azamattardyń yntymaqtyq jaýapkershiligi máseleleri qozǵaldy. Bizdiń qoǵamda naýqastyń densaýlyǵyna da, onyń ómir saltyna da dáriger jaýapty. Dál osy mentalitetti ózindik sana-sezimge almastyrǵymyz keledi. Meditsinalyq qyzmetkerlerdiń mártebesin kóterý de - mańyzdy faktor. Elektrondy densaýlyq saqtaýdy damytýda aqparattyń qoldy bolmaýyn qamtamasyz etken jón», - dedi QR DSM Densaýlyq saqtaýdy damytý respýblikalyq ortalyǵynyń bas direktory Ainur Aiyphanova Respýblikalyq densaýlyq saqtaý ortalyǵynda ótken kezdesýde.
Onyń aitýynsha, jańa memlekettik baǵdarlama jeltoqsan aiynda bekitilip, 2020 jyly engiziledi.
«Biz eń basty úsh mindetti aiqyndadyq. Alǵash ret memlekettik baǵdarlama ǵana emes, aldaǵy alty jylǵa densaýlyq saqtaýdyń qarjylyq modelin quryp otyrmyz. Biz JIÓ shyǵyndaryn 5% deiin ulǵaitamyz. Shyǵyndardyń basym bóligi meditsinalyq qyzmetterge jumsalady. Biz memleketten aldaǵy birneshe jylǵa densaýlyq saqtaý shyǵyndaryn ulǵaitýdy suradyq. Saiasi turǵyda tym asqaq estilgenimen, Prezident qoldady», - dedi A. Aiyphanova.
