Osy jyldyń sońyna deiin 643 aýyl Internet jelisine qosylady. Bul týraly Ortalyq komýnikatsiialar qyzmetindegi brifingide QR Tsifrlyq damý, qorǵanys jáne aeroǵarysh ónerkásibi vitse-ministri Daryn Tuiaqov aitty, dep habarlaidy QazAqparat.
«Búgingi kúni tótenshe jaǵdai kezinde Internet júiesi eń qajetti qural bolyp otyr. Sondyqtan halyq arasynda áleýmettik júielerde Internettiń sapasy jaiynda kóptegen máseleler týyndaýda. Osyǵan bailanysty, Internettiń úzdiksiz jáne sapaly jumys isteýin qamtamasyz etý maqsatynda eńbek etip júrgen aldyńǵy qatarly bailanys operatorlarynyń basshylarymen birge, Internettiń búgingi jaǵdaiy týraly sizderdi habardar etpekshimiz. Bizdiń ministrliktiń salalyq memlekettik organ retindegi negizgi mindeti - árbir qazaqstandyqtyń joǵary jyldamdyqty Internetke qosylý múmkindigin qamtamasyz etý telekommýnikatsiia qyzmetteri naryǵyn arttyryp, qyzmetterdiń basqa da túrlerin ulǵaityp, tutynýshylardyń suranysyn jaýyp, el ekonomikasyn kóterý bolyp sanalady. Bul oraida, osy mindetti oryndaý maqsatynda bailanys operatorlarymen birlese otyryp, birqatar jobalar iske asyrylýda», - dedi ol.
Vitse-ministrdiń aitýynsha, qoldanystaǵy «Bailanys týraly» Zańǵa sáikes, bailanys operatorlary óz qarajattary esebinen bailanys júielerin salý jáne damytýdy iske asyrady.
«Bul jumys 2018 jyly bastalǵan bolatyn. Eki jyl ishinde kóp jumystar atqaryldy. Jalpy joba boiynsha 1250 aýyldy Internet jelisine qosý josparlansa, búgingi tańda 607 aýyl qosylǵan. Aldaǵy ýaqytta bul jumys jalǵasyn taýyp, qalǵan 643 aýyl jyl sońyna deiin Internet jelisine qosylatyn bolady», - dedi ol.
