Almaty oblysynda "Nurly Jer", "7-20-25" jáne "Baqytty otbasy" baǵdarlamalarynyń arqasynda ótken jyly 2 443 otbasy páter aldy, onyń 1 779-y - kóp balaly otbasylar. Bul týraly búgin Taldyqorǵanda ótken esep berý kezdesýinde Almaty oblysynyń ákimi Amandyq Batalov aitty.
Halyqtyń eń ózekti sanalatyn máselesi – baspanamen qamtý boiynsha 2019 jyly 894 myń sharshy metr turǵyn úi iske qosylǵan, bul 2018 jylmen salystyrǵanda 25% artyq.
- Alaida kezektegiler sany azaimai otyr, búgingi tańda 50,7 myń adam kezekte tur, onyń 20 myńy – áleýmettik áljýaz sanattaǵy jáne 5527-si – kóp balaly otbasylar. Sondyqtan biylǵy jyly turǵyn úi men injenerlik infraqurylym salýǵa bólingen qarjy 1,6 esege ulǵaitylyp, 32,6 mlrd. teńgeni qurady. Barlyǵy 939 myń sharshy metr úidi paidalanýǵa berý, onyń ishinde «Nurly jer» baǵdarlamasy boiynsha - 147,7 myń sharshy metr úidi iske qosý josparlanǵan. Barlyq baǵyttar boiynsha 3600 otbasyny, onyń ishinde 2400 áleýmettik az qamtylǵan, kóp balaly otbasyny turǵyn úimen qamtamasyz etý mindetin qoidyq. Sonymen qatar, Qarasai, Ile, Talǵar aýdandary men Qapshaǵai qalasynda jeke qurylys salýshylar 1300 páterlik jeti turǵyn úi keshenin salatyn bolady. Odan ári jyl saiyn keminde bir mln. sharshy metr turǵyn úidi berip otyramyz, - dedi A. Batalov.
Osy rette oblys ákimi óńir kásipkerleriniń de bul iske úles qosyp otyrǵanyn rizashylyqpen jetkizdi. A. Batalovtyń aitýynsha, olar muqtaj otbasylarǵa kómek berýdi paryz sanap, ótken jyly 170 pátermen qamtamasyz etken. Ótken aptada metsenattar Qapshaǵai qalasynda taǵy 30 páterdiń kiltterin tapsyrdy.
Almaty oblysy ákiminiń baspasóz qyzmeti
