QR Premer-Ministri Asqar Maminniń tóraǵalyǵymen ótken Úkimet otyrysynda 2019 jylǵy qańtar-qyrkúiektegi respýblikalyq biýdjettiń oryndalýy jáne elimizdiń áleýmettik-ekonomikalyq damý qorytyndylary qaraldy, dep habarlaidy "Ult aqparat".
Osy jyldyń qańtar-qyrkúiek ailarynda JIÓ ósimi ótken jyldyń sáikes kezeńimen salystyrǵanda 4,3% qurady. Qurylysta – 13,5%, saýdada – 7,6%, kólik salasynda – 5,5%, óńdeý ónerkásibinde, sonyń ishinde mashina jasaýda – 18,2%, jeńil ónerkásipte – 19%, metall kenderin óndirýde – 16,1%, munai óńdeýde – 7,2%, bailanys qyzmetinde – 4% oń ósim baiqalady.
Ulttyq qordyń aktivteri 2,4%-ǵa $59,4 mlrd deiin ulǵaidy, respýblikalyq biýdjet kiristeri – 7677,6 mlrd tg (jospardyń 100,8%), ósim qarqyny 112,6% qurady. Halyqtyń jan basyna shaqqandaǵy ataýly aqshalai tabysy 2019 jylǵy qańtar-shildede 686 myń teńgeni qurady jáne 2018 jyldyń tiisti kezeńimen salystyrǵanda ataýly máninde 10%-ǵa, naqty máninde 4,7%-ǵa ósti.
Sonymen qatar, birqatar biýdjettik baǵdarlamalar ákimshilerinde biýdjet qarajattaryn igerýsiz qaldyrý jaǵdailary baiqalady, eń kóp soma ekologiia ministrliginde – 1,5 mlrd teńge, mádeniet jáne sport ministrliginde – 1 mlrd teńge, saýda ministrliginde – 0,9 mlrd teńge, Almaty ákimdiginde – 2,2 mlrd teńge, Almaty oblysy ákimdiginde – 1,1 mlrd teńge, Túrkistan oblysy ákimdiginde – 1 mlrd teńge, Shyǵys Qazaqstan jáne Qaraǵandy oblystary ákimdikterinde – 0,8 mlrd teńgeden, Batys Qazaqstan oblysy ákimdiginde – 0,7 mlrd teńge, Aqmola oblysy ákimdiginde – 0,6 mlrd tg.
9 aida ST-KZ boiynsha jergilikti qamtýdyń eń joǵary kórsetkishterine Qyzylorda oblysynda jeńil ónerkásip salasynda (46%), Pavlodar oblysynda jihaz (59%), azyq-túlik jáne qurylys salalarynda (54%) qol jetkizildi.
«9 aidyń qorytyndysy boiynsha ekonomika ósiminiń negizgi bazalyq kórsetkishteri boiynsha Atyraý, Shyǵys Qazaqstan, Túrkistan, Jambyl, Pavlodar oblystary ákimdikteriniń oń jumysyn atap ótkim keledi. Bul artta qalýshy óńirler úshin jaqsy úlgi. Óz kezeginde, keibir ákimdikterde birqatar kórsetkishter boiynsha tómendeý baiqalady», — dep A. Mamin, óńir basshylaryna atalǵan jaǵdaidy qysqa merzim ishinde túzeýdi tapsyrdy.
Úkimet basshysy ákimderdiń jergilikti qamtý boiynsha bekitilgen indikatorlardy oryndaý úshin barlyq qajetti sharalardy qabyldaýy qajet ekenin, sondai-aq, zańnama, indýstriialyq sertifikat jáne ST-KZ sertifikaty talaptarynyń oryndalýyn qamtamasyz etý qajet ekenin aitty.
Premer-Ministr Qyzylorda, Pavlodar jáne Túrkistan oblystarynyń ákimdikteriniń satyp alýdaǵy qazaqstandyq qamtý úlesin arttyrý jumysyndaǵy jaqsy kórsetkishterin atap ótti. Úkimet basshysy «Atameken» UKP pen Qarjy ministrligine ákimdiktermen memlekettik satyp alýdy júrgizý boiynsha durys jumys atqarý turǵysynan qosymsha seminarlar ótkizýdi tapsyrdy.
«Osy josparlanǵan kórsetkishterge qol jetkizý boiynsha óńirler basshylarynyń jumysy baǵalanatynyn taǵy da atap ótemin», — dep túiindedi A. Mamin.
QR ulttyq ekonomika ministri R. Dálenov, Ulttyq bank tóraǵasy E. Dosaev, Premer-Ministrdiń Birinshi orynbasary – qarjy ministri Á. Smaiylov, «Atameken» UKP basqarma tóraǵasy A. Myrzahmetov ekonomikanyń, bank salasynyń jaǵdaiy, respýblikalyq biýdjettiń oryndalýy, memlekettik satyp alýdaǵy jergilikti qamtý máseleleri týraly baiandady, Batys Qazaqstan oblysynyń ákimi Ǵ. Esqaliev, Qyzylorda oblysynyń ákimi Q. Ysqaqov, Soltústik Qazaqstan oblysynyń ákimi Q. Aqsaqalov óńirlerdegi jaǵdai týraly baiandady.
