Jyldyń 9 aiynda elimiz boiynsha tirkelgen 30 eńbek daýynyń 28-i Mańǵystaý oblysynda bolǵan. Ortalyq kommýnikatsiialar qyzmetinde ótken brifingide QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komitetiniń tóraǵasy Erbol Nurǵaliev osyndai derek keltirdi, dep habarlaidy QazAqparat.
«Eńbek daýlaryna keletin bolsaq, biylǵy 9 aidyń qorytyndysy boiynsha, elimizde 30 osyndai shielenis boldy. Biz bul jerde kásiporyn jumysy 3 saǵattan artyq toqtap turǵan oqiǵalardy esepke alamyz. Sonyń 28-i Mańǵystaý oblysynda boldy. Ózderińiz bilesizder, qazir Mańǵystaý oblysyndaǵy jaǵdai ońai emes. Bul jóninde Prezident tapsyrma bergen. Bul jerde ahýaldy túgel zertteý úshin arnaiy ortalyq qurylyp otyr. Ol ortalyqqa bizdiń mamandar da kirdi. Qazir tiisti jumysty isteýge kiristi», - dedi Erbol Nurǵaliev.
Atalmysh brifingide QR Bas memlekettik eńbek inspektory Tólegen Ospanqulov jumys berýshiler vaktsina almaǵandardy jumystan ótemaqysyz shettete alatynyn aitty.
«Eńbek kodeksiniń talaptary boiynsha búgingi tańda jumys berýshiler respýblikanyń nemese óńirdiń bas sanitar dárigeriniń qaýlysy negizge ala otyryp, vaktsina almaǵan jáne PTR testiden ótpegen jumysshylardy eńbekke aralastyrmaýy kerek. COVID-19-ben aýyrǵan adamdy jumysqa jibermeý kerektigi týraly tikelei norma bolmaǵanymen, Eńbek kodeksiniń 48-babynyń 1-bóliginde zańnamalyq jáne memlekettik organdar shyǵarǵan aktiler negizinde eńbekten shekteýge jol beriletini aitylǵan. Iaǵni, Densaýlyq týraly kodeks boiynsha Bas sanitar dárigerdiń qaýlysyn oryndaý mindetti. Sondyqtan qazirgi tańda jumys berýshiler vaktsina almaǵan jumysshylardy eńbekten shekteýge quqyly. Tipti jumystan shettetilgen ýaqytta ailyq tólemei de shektei alady. Biraq ekijaqty kelisim bolsa, ailyqtyń 50 paiyzyn nemese eń tómengi ebekaqy mólsherin tólei alady. Biraq eki jaqtyń da kelisimi bolǵanda ǵana osylai bolýy múmkin», - dedi Tólegen Ospanqulov.
