2020 jylǵy qańtar-tamyz aralyǵynda jalpy somasy 153,3 mlrd teńgege 390 myń otbasy kópbalaly otbasylarǵa arnalǵan memlekettik járdemaqymen qamtyldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginiń baspasóz qyzmetiniń málimetinshe, tamyz aiynda osy járdemaqy túrin jalpy somasy 19,7 mlrd teńgege 394,1 myń otbasy alǵan.
Atalǵan memlekettik járdemaqyǵa 4 jáne odan kóp birge turatyn kámeletke tolmaǵan nemese kúndizgi bólimde oqityn 23 jasqa deiingi stýdent balalary bar otbasylar tabysyna qaramastan úmitker bola alady. Tólem mólsheri balalardyń sanyna bailanysty 44 532 teńgeden (4 bala) 77 951 teńgege (7 bala) deiin, 8 jáne odan keiingi ár balaǵa 4 AEK-ten saralanǵan.
Osylaisha, járdemaqynyń ulǵaiýy 8 jáne odan da kóp balasy bar otbasylar úshin jeke mólsherdi belgileý arqyly qamtamasyz etildi. Tiisti zańǵa Memleket basshysy aǵymdaǵy jylǵy 13 mamyrda qol qoidy.
8 balasy bar otbasy úshin járdemaqy 88 896 teńgeni quraidy, 9 balaǵa – 100 008 teńge, 10 – 111 120 teńge, 11 - 122 232 teńge, 12 – 133 344 teńge, 13 – 144 456 teńge, 14 – 155 568 teńge, 15 - 166 680 teńge, 16 – 177 792 teńge tólenedi.
Zań 2020 jyldyń 1 qańtarynan bastap kúshine endi, osyǵan bailanysty 8 jáne odan kóp balasy bar kópbalaly otbasylarǵa beriletin járdemaqy mólsheri taǵaiyndalǵan kezden bastap qaita esepteldi. Sonymen, aǵymdaǵy jyldyń shilde aiynda atalǵan otbasylar jańa mólsherde járdemaqyny, sondai-aq qańtar-maýsym ailarynda qalyptasqan aiyrmany aldy.
Jalpy, 2020 jyly kópbalaly otbasylarǵa memlekettik járdemaqy tóleýge respýblikalyq biýdjetten 191,1 mlrd teńge qarastyrylǵan.
Eske sala keteiik, Qazaqstandaǵy kópbalaly otbasylarǵa olardyń kiristerin esepke almai beriletin jańa memlekettik járdemaqy, 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde qarastyrylǵan tabysy az jáne kópbalaly otbasylardy qoldaýdyń úsh negizgi baǵyty aiasynda engizildi.
