Qazaqstanda «Eńbek» memlekettik baǵdarlamasyna 580,9 myń adam qatysýda, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, biylǵy jyldyń 10 aiynda 580,9 myń adam Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynyń qatysýshysy boldy.
Ol arqyly 379,5 myń adam jumysqa ornalastyrylsa, onyń ishinde 231,5 myń adamy turaqty jumysqa turdy.
198 myńnan astam adam sýbsidiialanatyn jumys oryndarymen qamtyldy, onyń ishinde 18,6 myń adam áleýmettik jumys oryndaryna, 33 myń adam jastar praktikasyna, 147,1 myń adam qoǵamdyq jumystarǵa ornalastyryldy.
Eńbek resýrstarynyń utqyrlyǵyn arttyrý maqsatynda aǵymdaǵy jylǵy 1 qarashadaǵy jaǵdai boiynsha jumys kúshi mol óńirlerden 5 360 adam, iaǵni 1 535 otbasy qonys aýdardy.
2020 jylǵy 1 qarashadaǵy jaǵdai boiynsha qysqa merzimdi oqytý kýrstaryna 18,2 myń adam jiberildi, TjKB boiynsha oqytýmen 18,4 myń adam qamtyldy.
Memlekettik baǵdarlama aiasynda jyl basynan beri jappai kásipkerlikti damytý úshin 12 109 mikrokredit berildi, onyń ishinde aýyl turǵyndary 10 929 mikrokredit aldy. Mikrokredit alýshylar 12 738 jumys ornyn ashty.
«Sondai-aq, baǵdarlamaǵa qatysýshylarǵa jańa biznes-ideialardy júzege asyrý úshin 200 AEK mólsherinde 38 myńnan astam memlekettik grant beriledi. Aǵymdaǵy jylǵy 1 qarashada 34,1 myńnan astam grant bólinip úlgerdi. Budan basqa, 33,2 myń adam «Bastaý Biznes» jobasy boiynsha kásipkerlik negizderine oqytýdan ótti»,-delingen habarlamada.
