QR Bilim jáne ǵylym ministri Ashat Aimaǵambetov elimizdiń mańyzdy álemdik deńgeidegi jarystarda – matematika men biologiiadan halyqaralyq olimpiadalardaǵy oqýshylardyń jetistikteri jaily málim etti. Bul týraly vedomostvo basshysy Facebook-tegi paraqshasynda jazdy, dep habarlaidy "Ult aqparat".
«Qazir búkil álemniń ári elimizdiń nazary Tokiodaǵy Olimpiada oiyndarynda.
Biz Qazaqstan quramasyna jankúiermiz.
Bul postta elimizdiń basqa da mańyzdy álemdik deńgeidegi jarystarda – matematika men biologiiadan halyqaralyq olimpiadalardaǵy oqýshylardyń jetistikterimen bóliskim keledi.
Matematika páni boiynsha olimpiadada bizdiń oqýshylar alty medal jeńip aldy, onyń ishinde bir altyn, 3 kúmis jáne 2 qola bar. Elimizdiń atynan álemdik deńgeidegi olimpiadaǵa Nur-Sultan, Almaty, Qaraǵandy jáne Atyraý qalasynan alty oqýshy qatysty.
Altyn medal iegeri – Myrzatai Aibek, kúmis medal iegerleri – Dúisenbekov Danat, Satýbaldin Tair, Sam Fetýllah, qola medal iegerleri – Oljabaev Asylbek jáne Baimýrzin Rahim.
Biologiia páni boiynsha olimpiadada el namysyn Nur-sultan, Almaty, Óskemen jáne Aqtóbe qalalarynan 4 oqýshy qorǵady. Olar 1 kúmis jáne 2 qola medal, sondai-aq 1 Qurmet gramotasyn ulttyq quramanyń qorjynyna saldy.
Kúmis medaldi Temirbekov Erasyl, qolany Batyrjanov Ernar men Ernazarov Baqdáýlet, Qurmet gramotasyn Ábdýáli Gúldana jeńip aldy.
Olimpiada júldegerlerin, olardyń ata-analaryn, muǵalimderi men jattyqtyrýshylaryn jeńisterimen quttyqtaimyn!
Qurmetti oqýshylar!
Bul – sizderdiń eńbekterińizdiń jemisi. Sizder álemniń júzden astam elindegi qurdastaryńyzben ziiatkerlik saiysta jarysyp, elimizdiń namysyn abyroimen qorǵadyńyzdar.
Bolashaqta biik belesterdi baǵyndyrýdy tileimin! Biz óz tarapymyzdan qazaqstandyq oqýshylar ózderin kúlli álemge tanyta otyryp, halyqaralyq baiqaýlarda budan da úzdik nátijeler kórsetýi úshin jaǵdai jasaýdy jalǵastyramyz.
Osy jyldyń basynan beri bizdiń oqýshylar halyqaralyq olimpiadalarda 200-den astam medal jeńip alyp, óz bilimderiniń joǵary deńgeiin kórsetti», - dep atap ótti Ashat Aimaǵambetov óz jazbasynda.
